地產發展商同代理都不時參與公益活動，信和集團執行董事余惠偉話，喺十月十一至三十日，嚟信和旗下商場，同保良局轄下各服務單位填贊助表格，捐三十八蚊，就可以助養一隻「愛心小鴨」，同獲得一張助養證。
十二月十二號會喺屯門黃金海岸舉行「保良局．信和集團善有善Duck」慈善籌款活動，啲膠鴨仔喺海面飄浮，贏咗嘅鴨仔，助養人可以獲得禮品，若嗰隻係全場唯一嘅「信和金鴨」，助養人就可以得一間價值二百萬嘅住宅，雖然機會渺茫啲，但做善事應該唔介意嘅。至於所得嘅善款，全部捐畀保良局。喺樓市熾熱情況下，信和呢招夠晒矚目。
另外，美聯日前擺慶功宴，順便搞「勾歌籌善款」，籌到八萬零八百蚊畀美聯慈善基金。而世紀21就參加遊艇比賽，為兒童癌病基金籌到三萬蚊。
盈大薄扶林貝沙灣會所又加入新元素，新主題叫做SkyClub，同香港商用飛機公司合作，提供私人飛機服務。一手買家可以獲得積分，憑積分使用由SkyClub安排嘅私人飛機或直升機服務，可以選擇用勞斯萊斯或者跑車接送往機場。SkyClub又可以度身訂做行程，同提供私人客機服務員。
盈大顏金施話，積分多少視乎購買單位類型，例如買一個兩房單位，積分就應該可以夠一個人搭私人飛機一趟；一架機有十個位，要包機就要買多幾個單位。
香港商用飛機銷售及企業發展總監林烈風話，私人飛機航程分五個地區，最近就係台北、華南，最遠就可以去到關島、東京。
樓市大升，就連金融風暴後一直落後大市嘅工業樓價，一樣勁升八成，中原地產李彥樺話，觀塘駱駝漆大廈三期一個高層三千幾呎單位，業主早兩年以一百六十七萬買入，原本只係諗住以二百萬放盤，不過最近有多個客搶住買，結果一間塑膠原料公司以高出八成，即三百萬承接，賺百三萬，回報率拍得住寫字樓同住宅。
早年廠家大部份北移，工廠空置率高企，駱駝漆大廈兩年前呎價跌破六百，淨係建築費都唔止呢個數。
近排接連出現風波嘅青衣灝景灣（圖四），大廈業主立案法團噚日登咗個廣告，召開業主大會，表決終止管理公司港基物業嘅合約，只係畀三個月通知期，而唔會畀任何賠償。業主大會會喺本月十七日舉行。
灝景灣八月份爆出採用「綑綁式銷售」嘅固網電訊服務，之後又被發現喺屋苑爆鹹水管事件中失職，唔知係咪咁，搞到業主立案法團要撤換管理公司。
樓價持續升，部份業主賣出單位後，倘有客肯出更高價洽購，不少會賠定再售，呢類個案近排多咗。港置執行董事李志成話，鰂魚涌逸樺園二座高層A室，面積一千零三十四呎，原本以六百七十八萬達成協議出售，但因有買家出更高價洽購，業主賠定再賣，結果以七百四十八萬成交，賺多幾十萬。
個單位一手購入價係五百七十七萬，一年唔夠，升值一百七十一萬，有近三成利潤，認真唔錯。樓價再咁升法，相信呢啲賠定再賣嘅個案，肯定陸續有來。
住得豪宅，通常都有一兩部車，但有時唔同場合，需要唔同款嘅車，用開嘅未必啱，𠵱家有辦法嘞，因為何文田君頤峰管理公司富城集團，同租車公司Hertz合作，提供車隊租賃服務，有多款車可揀，想包埋司機又得，重係二十四小時，隨時打個熱線電話就得。租車費用包埋架車嘅保險同維修服務費，設想周到。
若住戶入埋Hertz#1Club，去到全球七千個地區，可以有租車同酒店等優惠，入會重係免費㖭。
當大角嘴海輝道接連有新盤興建或入伙，好似凱帆軒入伙無耐、浪澄灣又拆晒棚、信和個盤又起到如火如荼，作為維港灣業主，眼見西面嘅維港海景正不斷被蠶食，都咪話唔心噏。最近就有業主申請想將𠵱家海輝道僅餘嘅一幅、係信和樓盤同浪澄灣中間嘅空地，改做公園或休憩用地，等佢哋可以留番「一扇門」嘅海景都好吖。
但呢幅地值成三十億，隨時會放喺出年嘅勾地表內。𠵱家樓價好似坐飛機咁升，發展商都用麵包價搶麵粉，政府會唔會順應民意呢？大家心中有數！
蘭西
電郵地址：
