恒指前日跌28點，昨日再跌59點。大市跌定等下周二賣地，到時賣地成績好，大市再炒上。𠵱家如果先升定，則賣地之後大市會有回吐。
國壽C輪：平保（2318）最高12.10元，收12元，升20仙，創新高。平保C輪2233最高升14%，埋單仍升10.4%。平保26球易手，增1倍，芬佬啲錢掟落去，有睇頭。平保升，國壽（2628）唔會原地踏步，有機拍住上。國壽就快郁，C輪有運行。唔使多心，1隻就夠，就係2143，157球轉手（發行量248球），波幅大（昨日波幅15%），1日可以炒幾轉。
中銀C輪：中銀（2388）高低10仙，收14.30元，跌斗零，「牛」一陣，估計向上移動，喺今年末季有機再上今年15.95元高位，撈定啲C輪搵錢買聖誕禮物，正路之選係9169。隻輪明年2月到期，輪價21.1仙，溢價只得1.3%，槓桿率6.8倍（有效5.9倍），引伸波幅22%，數據靚靚。
中電信C輪：大隻電訊股，中電信（728）最醒神，最高2.675元，收2.625元，進帳2格。中電信有運行，唔單止反映喺股價上，重反映喺成交上，全日有222球易手，係前日嘅4倍。重有，1.2球嘅成交（自動對盤最高成交量）總共有50宗，而且唔少係連環掃貨，即係幾秒鐘內連續掃好多手1.2球，前日呢類1.2球成交只係5宗。中電信咁嘅狀態，下文點樣唔使解畫。C輪「孖4孖9」最高43.5仙，收40仙，正股起5仙，佢起得1仙，唔夠，冇貨要買，有貨可以加碼。嫌唔夠刺激，可以諗埋2219。
章盛