選舉一向好辛苦，特別係直選，就更慘冇人道，所以噚日宣誓咁大日子，班議員嘅家人都盡量出席，見證呢個重要時刻，為佢哋打氣。
八方數一數，好多新議員嘅太太都嚟咗，包括湯家驊太太Daisy、梁君彥太太、郭家麒太太、鄭大班太太以及梁家傑太太等等。
咁另一半做議員，太太都預咗佢哋少咗時間陪家人。梁家傑太太好體諒個老公，話佢雖然繁忙咗，仍然盡量每晚有一個鐘陪屋企人，一齊傾吓偈、食吓生果，以後重會煲多啲湯水畀老公飲，真係賢妻也。
梁家傑三個仔女噚日本來都要返學，讀緊中四嘅大女穎翹因學校舉行水運會，下晝放假，所以同媽媽一齊出現。穎翹同八方講daddy勝出嗰日，佢哋買咗個蛋糕全家慶祝。
梁家傑同班大狀係傳媒新寵，肯定有排唔得閒，噩夢啱啱開始啫。前晚梁大狀就因入行會傳聞，覆記者電話覆到手軟，連水都冇得游，十點幾先離開公司，八方問佢有乜感覺，佢只係話，「好攰，淨係想返屋企。」
傳真︰2623-9278
電郵︰