本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如僱主或僱員有任何疑問，可致電勞工處熱線：27171771查詢。
明仔：王老闆，阿全剛剛打電話返公司話佢胃出血，醫生畀咗兩星期病假佢。
王老闆：唉！公司已經唔夠人手，佢重請病假。咁啦，我補一個月人工畀佢，你叫佢以後唔使返工啦。
明仔：老闆，你咁即係炒阿全魷魚。
王老闆：無法啦！不過我會補番一個月人工畀佢。
明仔：老闆，阿全𠵱家放緊有薪病假，我哋唔可以隨便炒佢魷魚。《僱傭條例》講明，除非僱員犯咗嚴重過失將佢即時解僱外，僱主唔可以解僱放緊有薪病假嘅職員。
王老闆：但係我哋𠵱家正需要人手……
明仔：老闆，如果你炒咗阿全，公司就犯法，會被刑事檢控，一經定罪，最高可被罰款10萬元，另外，你重要喺炒阿全後嘅七日內，支付佢嘅解僱代通知金加七天工資同兩星期病假津貼。
重有《僱傭條例》嘅「僱傭保障」部份規定，僱員如果受到不合法、不合理解僱，而且符合法例規定嘅資格，就可以向僱主提出補償申索，賠償可以包括復職/再次聘用或領取終止僱傭金以及補償金。
王老闆：咁佢病緊又無埋份工確係好慘嘅。好啦，你叫佢病好就快啲返來啦。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
資料提供：勞工處勞資協商促進科
服務熱線
電話：29908288
傳真：23702192
電郵：