雖然噚日大市回軟，但唔少股份繼續熱炒，其中當然唔少得小初提及的國美電器（493），國美噚日最高見過6.25元，收5.85元，升幅有成23.16％，成交股數1287.7萬股，金額7030萬元。
上個月以每股3.98元認購國美配售股份的芬佬，今次大豐收，恭喜恭喜。經紀黃話，證券界乃出名跟紅頂白的地方，一隻股份之前冇人留意，不過一旦炒起兼夾有幾個大基金成為股東，自然有其他證券行錦上添花，出報告美言一番，所以就算國美股價將來繼續升，佢一啲都唔會感到出奇。
其實芬佬呢期鍾意乜嘢呢？經紀黃提議，留意新灃（1223）同埋李寧（2331），兩間公司產品都同運動有關，前者做鞋，後者連運動衫褲都有，而李寧更有大陸零售概念，兩間公司均於上月中公布中期業績盈利大升，之後股價亦扶搖直上。
新灃噚日升6.54％，收1.63元，成交股數2292.9萬股，金額3699.6萬元。至於李寧亦升4.76％，收3.30元，創上市以來新高，成交股數584萬股，金額1903萬元。
慕容小初