車路士今屆喺摩連奴帶領之下，俾人話踢啲波好悶，淨係識得防守，成日贏對手一比○，迄今先至入得八球；但原來佢哋喺過去八輪超聯嘅射門，重多過入多佢哋成十八球嘅阿仙奴，唔怪得熱刺領隊辛天尼寸摩連奴，話如果由佢嚟帶車仔，入球肯定係冧巴溫啦！
據統計數字顯示，車仔喺過去七輪超聯嘅射門次數係各隊之冠，共有一百一十一次，而阿仙奴同曼聯就分別只得一百零一次同一百零二次。但射門多唔代表入波多，車仔入得嗰八球，平均要起腳十五點八六次，先有一球進帳；而入咗二十六球嘅阿仙奴，平均射四點○四次門就有一個入球（截至上周五），認真厲害。
站喺車仔立場，贏波先至最重要，如果前面入四球但後面失五球，真係入幾多都冇用。但既然車仔被人踢爆攻門次數咁多，咪我話求大俠唔提醒大家，下次買車仔啲波嘅波膽，咪淨係買一比○，應該圍埋二比○同三比○，咁就包冇失拖。
羅馬中場迪羅斯都幾有品，話說佢禮拜日聯賽踢傷國米馬田斯後，日前主動打電話問候對方兼道歉。講開呢個後生仔，羅馬會長辛斯日前話佢係托迪最佳接班人，我求大俠一聽就覺得羅馬有心營造一個新領袖，等托迪、卡斯辛奴知道球會當日提拔得佢哋，一樣可以有另一粒星。
原本喺英乙聯球隊波士頓聯做球員兼教練嘅加斯居尼，日前宣布辭職，轉去讀教練課程。呢位三十七歲嘅前英格蘭國腳話第日想做個最頂級嘅領隊，於是就走去讀書，藉以增加呢方面嘅知識。難得加斯居尼佢咁識諗，我求大俠都可戥佢開心，但希望佢唔會係三分鐘熱度啦！
重召34歲加西亞委國想重演再贏森巴
喺十一年前射爆巴西大門嘅加西亞俾委內瑞拉重召，備戰周六對巴西場世盃外圍賽。加西亞係唯一可喺世盃外圍賽入巴西波嘅委內瑞拉球員，故委內瑞拉準備用佢嚟對付巴西，但加西亞當年得二十三歲，𠵱家成三十四歲，已今非昔比，故委內瑞拉想歷史重演，睇嚟都幾難。
喺今屆德甲聯重未開齋兼重坐緊波監嘅巴西前鋒艾列頓，話有間日本球會利誘佢喺季尾過檔。𠵱家史浩克冇咗艾列頓，表現反而好咗，而且另外三名前鋒艾沙姆、漢基同辛特狀態都好弗，加上艾列頓嘅年薪成三百萬歐元，如果我求大俠係史浩克高層，一定成全佢畀佢去日本掘金。