長毛大鬧立法會，轟轟烈烈揭序幕。法庭拒絕「司法覆核」，長毛另闢途徑，着住件「平反六四」黑T恤，遲到十分鐘，將增刪版誓詞斬件上市，先在座位高舉左手大喊「平反六四、還政於民、結束一黨專政」，再走向議事堂中部，宣布效忠中國人民及香港市民，反官商勾結等，最後再將立法會定版誓詞好似斷截禾蟲咁分拆讀出，滿城風雨之中，達致雙贏。
將誓詞斬件分拆，各取所需，聽長毛嘅語氣，讀到自己嗰一part，就七情上面，誠意十足，讀到立法會誓詞欽定本，就讀到死蛇爛鱔，求其敷衍。最後重憤而拒絕簽署誓詞，以示蔑視，雖然曾鈺成告狀發難，但即時遭到立法會秘書馮載祥頂番轉頭，指出長毛唔簽署誓詞，完全合法。
長毛透過表情、語氣、節奏三個方面，蓄意將特區立法會官方欽定版誓詞矮化、淡化、醜化，再片頭片尾，同場加映兩截中西短片，補拍一段英語版「民主萬歲」，全球人士，個個聽得明，對於提高香港亞洲國際城市嘅地位，可謂立一大功。
土共以為憑誓詞一關，可以迫到長毛跪低爬狗洞，點知長毛學咗肥彭嘅政制改革方案，鑽盡《基本法》條文漏洞，成功做咗議員，又大步檻過咗個火盆，既拒絕跪低，又昂然進入立法會，咁搞法，日後重有好多鑊精采之作，一定奇情震慄，高潮迭起，包保值回選票㖭。
長毛成功奪取主動，製造懸疑，令到全球新聞傳媒嘅鏡頭，成功集中喺自己身上。佢夠膽闖禁破壞規條，阿董又唔夠膽叫「實Q」及飛虎隊空降立法會拉佢出去，開咗咁嘅先例，唔知「四十五條關注組」及泛民主派系，會唔會全部都學長毛咁玩嘢呢？
若然話長毛搞到立法會大亂，咁阿董七年來搞到香港經濟大亂；星展銀行怒碎保險箱，搞到銀行體制聲譽大亂；土共鄔曾集團不按香港規律辦事，謾罵香港人，搞到香港政治氣氛大亂，又由邊個負責？有咁嘅孽因，就有長毛咁嘅鬧劇開心果，唔好問長毛點解受六萬選民所託合法搗亂，要問吓邊個首先生亂？董團夥係咪應該反省吓？例如人哋郭晶晶本來好好哋哋，純情清秀，一嚟到由董團夥統治嘅特區，俾佢帶住去金舖掃一輪珠寶，卒之就搞到受𠝹於霍啟剛嘞，你話資本主義呢個萬惡制度，係幾咁腐蝕我國嘅青少年呢？
傳真︰2623-9278
電郵︰