張學友前晚以電影《第五元素》中飾演奸角的加利奧文之髮型亮相慈善演唱會，更邊唱邊吃蘋果，不過他在獻唱時卻不斷蝦碌，入錯歌及重複歌詞，有如跳線一樣。
張學友前晚在會展舉行「活出生命光彩演唱會」，以新髮型亮相，驟眼看有如八十年代的蠱惑仔，但學友卻謂是參照電影《第五元素》中飾演奸角的加利奧文（GaryOldman）的髮型，他拿着蘋果在台上邊吃邊唱，更演繹了很多別人的金曲，包括張國榮及陳百強的經典作品。不過在新髮型的襯托下，他演唱《但願人長久》時竟兩次入錯歌。
其後學友又獻唱古巨基及楊千嬅的歌曲，當他唱千嬅的《小城大事》時，唱到歌詞一個「你」字，竟重複兩次，好像唱片跳線一樣，十分搞笑。即使唱自己歌曲《講你知》時，學友也要看貓紙，他說：「我成日要睇住歌詞嚟唱，估唔到自己歌都要睇歌詞，譚詠麟有接班人呀。」
至於前晚捧場的圈中人十分多，包括許志安、方力申、鄭融、劉浩龍、杜麗莎及UncleRay等，而楊受成與3T成員之一的Maggie也分別到場。
事後學友接受訪問，表示頸傷復發，他說：「我返到後台醫生就幫我睇，喺台上唱歌分散注意力都唔係咁大影響，希望可以喺做《雪狼湖》前醫好佢。」
提到新髮型，學友說：「我平時頭髮好長，食飯都會遮住眼，要問個女借髮夾夾住，呢個頭係參考《第五元素》個奸角加利奧文而整出嚟。」
對於陳奕迅的女兒周一出生，學友說：「本來想喺台上恭喜佢，又唔知佢公布咗未，我都有打電話同send短訊畀佢。」
採訪：王連連
攝影：葉君海
