上星期國美電器（493）大股東配售3億股舊股，由於國美之前曾經搞過兩次配股都撻Q，故此小初唔睇好，點知不但搞得成，而且要貨的投資者全部係有名望嘅芬佬，所以難怪除復牌當日下跌外，之後都企得好硬。
國美大股東喺上個星期初，以每股3.98元減持3億股，套現近12億元，相比之前幾十億元的規模，無論作價同埋size都縮細好多，但終於可以修成正果。
今次接國美批貨的芬佬，除咗大家熟悉的金手指增持42球之外，原來大摩都要咗22球，另一個美資基金亦趁機增持，合共揸住12球，認真唔簡單。
國美噚日升2.15%，收4.75元，成交股數450.87萬股，金額2122萬元。今次認咗貨嘅芬佬，帳面賺近兩成，真係飲得杯落。
另外，多次改名同埋轉變業務的陽光體育媒體（307），噚日突然急升26.67％，收1.9仙，成交股數1.78億股，金額318.7萬元。經紀陳話，今次陽光轉型搞教育及引入新大股東，為公司帶來新希望，但隻股以往多次發行新股，股權甚為分散，跟炒風險甚高。
慕容小初