住家菜：
保鮮紙防倒汗水三色蛋滑嘟嘟

女士貪靚是人之常情，今次示範家常菜的讀者Daisy，平日返工貪靚之餘，連煮餸都要靚，意思是菜式賣相要靚，食了更要靚。三色蛋的鹹蛋和皮蛋做成美麗圖案；酸甜魷魚加青紅黃椒，顏色繽紛；白果腐竹薏米煲雞腳，湯水白如牛奶。
記者：馬靜兒
攝影：楊錦文
示範：讀者Daisy

跟很多OL一樣，讀者Daisy每日放工買餸，返到家中都已很晚，所以平日煮的餸都以簡單做法為主。
Daisy今次會教大家蒸三色蛋，即雞蛋、鹹蛋和皮蛋。「別以為蒸蛋是小兒科，要蒸出滑溜的蛋都有蹺妙，否則蒸蛋會變嚡。蒸蛋時用保鮮紙包裹，就可以防止倒汗水滴在蛋上，做成蛋面凹凸。不想用保鮮紙，就可以在蓋邊加筷子，讓蓋不完全密封，倒汗水就可以減少。如果想弄點花巧，就加少一點水，讓蛋硬些，可以將它切成條狀。不過，加了芫荽的蒸蛋已經很靚。」
煮餸要簡單之外，Daisy重話，即使煲湯都要快。「老公很怕出外吃飯，他說在家即使炒青菜，再加一點肉送飯都較出外吃飯食得舒服。我大多數會在放假時才煲老火湯，平日就選易做快煲的湯水，最緊要食咗會靚。我喜歡飲白果腐竹糖水，貪湯水呈奶白色，食咗夠滋潤，今次加雞腳變成湯水，雞腳膠質重，對皮膚有益。」

三色蛋
自製價：$8/2人份量

用咩料：
雞蛋 4隻
鹹蛋黃 2隻
皮蛋 1隻
雞湯 100毫升
芫荽 少許
鹽 少許

小貼士：
1.必須用薄碟蒸蛋，才容易蒸熟。

2.以微波爐保鮮紙封面，可以防止倒汗水滴落蒸蛋上，避免做成蜂巢紋。

3.以雞湯代替清水，可增加蛋的鮮味。

4.要蒸蛋容易切件，雞湯或水份不能過多，否則較難切。