陳奕迅（Eason）個女友徐濠縈（Hilary）前晚喺瑪麗醫院生咗個七磅半嘅囡囡。噚日Eason親筆寫咗封公開信畀各大傳媒，封信話老婆Hilary同個囡囡都好健康，而且又肥又白，個女英文名叫Constance，中文名就未改。
喺封信度，Eason重話好多謝大家關心，佢希望所有關心佢哋嘅朋友可以分享呢份喜悅，同時又多謝各位對佢家庭嘅祝福。
Eason經理人陳家瑛噚日則喺電話同馮仁昭話：「Eason個女好可愛，頭好大，下巴好尖，眼仔碌碌，不過𠵱家好難睇得出個囡囡似爹哋多，定係似媽咪多。噚晚（即前晚）Eason一直陪住老婆入產房生BB，佢兩公婆因為第一次做爹哋媽咪，所以都比較緊張，不過BB順產出嚟後，佢兩個就好興奮。」
此外，梁漢文噚日同女友去醫院探Hilary，離開醫院時佢話：「佢（指Hilary）好好精神，Eason就瞓咗，個BB女我都見過，但𠵱家太細，未知似邊個多啲。」而何韻詩噚日去商台接受訪問時就話：「希望Eason個女唔好似佢對腳咁，如果唔係就會好傷心啦。」
蕭薔噚日喺台灣出席手表Omega嘅宣傳，除咗有大概三十萬港幣嘅酬勞之外，大會重任佢揀十幾萬嘅手表，蕭薔梗係笑到合唔埋口啦，所以佢喺現場跳現代舞時亦特別賣力，重露出乳溝展示佢豐厚嘅本錢。蕭薔重話自己除咗識跳現代舞、探戈、chacha之外，牛仔舞都識，而佢最鍾意嘅係拉丁舞。
吳大維同吳倩蓮噚日出席尖沙嘴一間珠寶店開幕禮，吳大維話睇報紙知道趙薇同汪雨拍拖，而趙薇同汪雨都有去佢喺上海開設嘅夜店「官邸」玩，大家都有打招呼。吳大維重大讚汪雨係一個好男仔，至於趙薇早排牽涉入打人事件，吳大維認為件事可能畀傳媒講得嚴重咗，相信女仔都唔會打人嘅。
台灣導演李安最近拍緊一部講述兩個西部牛仔相戀嘅新片《BrokebackMountain》，部戲由於係改編自作家LarryMcMurtry嘅著名小說，所以Larry好緊張部片拍成點，當Larry知道李安改動過故事後，佢就話李安根本唔明原著嘅西部語言，但李安就誤會對方話佢唔識英文，重發火禁止Larry再喺片場出現。
早排有傳聞指喺荷李活發展嘅吳宇森，計劃將八十年代經典卡通片集《He-ManandtheMastersoftheUniverse》搬上銀幕，據知近日霍士已經同吳宇森落實合作協議，等吳宇森執導完新片《SpyHunter》之後，就會開始製作《He-Man》，而吳宇森除咗做導演之外，重會同拍檔張家振一齊做監製。
