早排俾車路士飛出局嘅阿聯酋航空，轉過頭出一億鎊（約十三億九千萬港元）贊助阿仙奴十五年，繼續留喺英超聯度玩。
阿仙奴噚日宣布，阿聯酋航空由○六/○七球季開始，喺佢哋件波衫賣八年廣告；除此之外，佢哋嗰個喺○六年夏天落成啟用嘅新球場，亦會以該中東公司命名，叫做阿聯酋航空球場，並為期十五年。
有睇開英超聯嘅朋友，應該知阿聯酋航空係英超聯球證同車路士嘅贊助商。佢哋同車仔份約會喺下季季尾約滿；消息話原本佢哋想同車仔繼續合作，但車仔嫌佢哋個名唔夠響，於是飛起佢哋。
但係車仔班主阿巴莫域治係生意人，冇理由咁大塊肥豬肉都唔食；計我求大俠話，可能係佢哋收到風知道阿聯酋一早同阿仙奴斟掂數，主動話唔要阿聯酋航空，攞返個彩。
富咸後衞伊恩皮亞斯因為控甩腳，搞到要超技術攔截水晶宮嘅安迪莊臣，結果領紅出場。查實佢唔係第一次比賽時出醜，之前效力布力般就試過喺底線插花，點知踩波車撻低。我求大俠知十個後衞九個腳法差，但伊恩皮亞斯明知自己技術有限，比賽時就唔小心啲，今次真係攞嚟衰。
朗拿甸奴真係孝順仔，繼周前將歐冠盃射入嘅十二碼，獻畀媽媽做生日禮物之外，最近又搵埋阿媽拍洗衣粉廣告，大賣溫情。內容係講細哨成日有乾淨衫着，秘密係佢媽媽每次都用呢隻洗衣粉，將佢由細到大踢完波啲污糟衫洗乾淨。可惜呢個廣告淨係喺巴西播，香港觀眾無得睇。
中超聯球隊北京現代罷踢單嘢，愈搞愈大，北京國安俱樂部總經理兼北京現代教練組組長楊祖武，就召開記者會話，佢哋喺上星期六對瀋陽金德時罷踢，因為覺得中國足壇打假波問題嚴重，重話「由球員到教練再到球會及球證，都好似喺『崩盤』前搶錢咁」。嘩！係咪咁黑暗呀？
因受傷同停賽而缺陣國際賽成二十個月嘅墨西哥攻擊球員白蘭高，終可返國家隊，重會喺今日對聖文森場世外圍賽上陣㖭。白蘭高當年以一招雙腳夾波而聞名，重有「夾波王」嘅稱號；𠵱家佢重返國際賽，球迷有機會欣賞到佢呢招媲美「施丹轉身」同「大哨插花」嘅絕技。