新一屆立法會今日開鑼，飛哥會繼續「捱義氣」幫港台做《議事論事》電視節目。飛哥錄影前話，原本都好想收山唔幫港台，上年《議事論事》喺亞記播，得嗰廿幾萬人睇，不過今年改無記播，借住《金枝慾孽》個勢，都有一百幾廿萬人睇，所以最後都接受港台挽留，繼續做主持啦。
《議事論事》噚日喺金紫荊廣場戶外錄影，重請到自由黨田少、民主黨何俊仁同埋民建聯葉國謙，講講三大黨新一年大計。三條友未開始辯論就先互窒。葉國謙話自己有少少肚腩，肚腩大過葉國謙嘅何俊仁，挖苦身材fit嘅田少話：「做到老細級先至有咁嘅身形，因為可以成日打波，我哋就成日坐喺度做！」
何俊仁話，民主黨星期日會搞「路向營」，會諗諗班大狀、大班同埋長毛嘅吸引力喺邊度。田少就窒何俊仁，去到○六年都爭取唔到○七、○八年雙普選啦，民主派到時就迫住要轉軚。至於邊個做特首，田少話佢自己「暫時就唔適合」，不過一定繼續支持商人治港，因為政治人物執政都未必掂。
（圖）何俊仁（左）笑田少（中）富貴，所以冇肚腩。
傳真︰2623-9278
電郵︰