個市大漲小回，恒指應酬式下跌28點。有啲靚數據嘅恒指C輪例如9911，仍有輕微進帳，意味個市唔會壞得去邊。
中電信C輪：電盈（008）做咗大悶股好耐，有些少突破，C輪9814彈升13%，收52仙，朝早低位上車，都有12%利潤暖袋。中電信（728）又係大悶股，落後大市，遲早有嘢睇，買定C輪4499有着數。「孖4孖9」唔似其他大多數輪10份兌1股，而係1兌1，明年6月到期，大把時間值，輪價39仙，溢價7.6%，槓桿率6.6倍（有效4.2倍）。中國網通密鑼緊鼓搞緊上市，有進一步詳情之時，就係中電信彈跳之日，好大機會一扯即起。昨日成交40球，識貨之人密密食緊貨。
和黃C輪：長實（001）除息實升38仙，和黃（013）因和電降價招股，跌75仙。和黃8月19日派中期成績表後第二日，李超人即開始擒擒青增持，至上月28日，總共28個交易天，老李買咗15日，即係每隔1日買1次，增持20.11球，最高價買到62元（昨日61.50元），用咗12億銀，唔係用長實嘅錢，係用私人嘅錢。你估老李儍㗎？和黃必有好嘢跟尾。吼住和黃跌價，買C輪，最正係2157，數據靚絕，可參考走勢圖嘅資料。
平保C輪：平保（2318）收11.80元，升10仙，個勢繼續向上，搵隻平保C輪炒炒，最佳對象係2233。隻輪明年2月到期，輪價1.64元，溢價2.9%，槓桿率7.2倍（有效5.6倍）。咪當係大價輪而以為少人玩，成交11.3球，銀両近千九萬，買賣貼價易出易入。
章盛