唔知係咪李顯龍時辰八字有少少當黑，李仔一坐正，新加坡當堂好惹火，繼李顯龍訪問台灣，遭到中國強烈炮轟；李顯龍向中方「解釋」之後，又輪到台灣行政院長游錫堃「鼻屎風波」，用閩南話指新加坡抬捧中國生殖器，點知咁都未夠，星展銀行美孚分行裝修，將九百二十個保險箱清除晒，點知其中八十三個係有客戶用緊嘅有餡保險箱，俾星展銀行一嘢兜埋！
就算賠都冇得賠。保險箱裏面嘅嘢好隱秘，大婆當年嫁妝珠寶有之，二奶珍藏嘅定情屋契亦有之，重有鄧小平生前親筆書寫欽定第三屆特首係陳方安生嘅遺話亦有之，開得銀行保險箱嘅，不止係中產。好多重係非富則貴，星展銀行將八十三個保險箱壓成廢鐵，除咗客戶損失咗好多珠寶屋契，亦分分鐘有大批歷史文獻遭到毀滅，做乜搞到咁失策呀？
保險箱主人老虎蟹都打死狗講價，例如可以話個箱裏面有：釋迦牟尼佛牙舍利一粒，楊貴妃曾經戴過嘅玉鈪一隻，蘇東坡書法真迹數幅，同埋康熙玉璽一隻等等，人人開張清單坡佬，佢賠到亡國都賠唔晒呀分分鐘！
但凡一個機構裝修，好易會發生呢啲掟寶落海嘅烏龍。例如當年老毛坐上北京中南海帝座，想裝修過個「首都」，於是下令拆晒北京啲城樓同城牆，將一座全世界獨一無二嘅建築寶庫，開始摧毀，一直到今日，重不斷拆胡同，起高樓大廈，全北京嘅四合院，二十年來只拆剩之前嘅百分之十七。
共產黨癲啫，坡佬又學佢癲埋一份？裝修還裝修，啲寶物要保住，新加坡都拆咗好多舊建築，剩番個牛車水，拆剩少少，再髹層灰水，搞到唔湯唔水。用咁嘅手法去裝修銀行，又點唔會出事。李顯龍當黑，好快啲學吓特區中秋節喺大坑舞火龍咁，喺烏節路舞番條，驅除吓啲衰嘢嘞！
傳真︰2623-9278
電郵︰