大市連升兩日後，在高位整固，恒指收13331，跌28點，成交亦縮到只得138億元。大市雖調整，但上升股隻（不計認股證）比下跌股隻多，而期指亦上升，收13398，高水67點；消化完成後，大市可向14000大關推進。
國企普遍跟市調整，國指收4756，跌21點。近期急升的原料股有回吐，但石化股表現硬朗，吉林化工（368）且逆市而升3仙。國企唞一兩日，升浪再起之時，石化股要優先留意，特別係吉化，噚日大戶重係咁買，必有所圖。
個別二三線股的升勢頗為悅目，安德利果汁（8259）突然發力，搶上1元高收，大升14.9%，成交更大增到3500多萬股，8月中時曾推介買入，當時股價0.81元，中線睇1.3元，家吓雖升到1元水平，但未到價，整固後可再上。
彩星集團（635）「係咁而」唞一日，又再上過，高成1.51元後回收1.49元，升5仙，成交又去到4700多萬股。彩星假前大升，成交激增，前日唞氣，交投縮晒，噚日再升，動力又轉強，獲利貨雖多，但大戶硬接，毫不手軟，睇勢後市重有排去，短線1.8元在望。
佑威國際（627）亦係一隻隨時會發力嘅偏低股，只要一確認轉勢，升20%至50%好閒。佑威噚日收0.405元，升1仙，暫時重受制3條短期平均線（都在0.409元水平），但噚日成交大增，應係突破先兆，一破位而上，新升浪確認，短線上升目標0.48元，中線可見0.62元。
04年度（3月年結），佑威營業額7.4億元，升28%，獲利1.14億元，大升3.8倍，每股盈利8.8仙，盈利中有4171萬元來自出售納米技術全資附屬公司10%權益。
現年度，順德有10條生產線的廠房快將投產，每月產量由現時的20萬件增至120萬件，可為集團帶來可觀的盈利貢獻，而假定再無特殊項目收益，佑威盈利仍可上升至1.3億元，每股盈利9.2仙，以目標價0.62元計，預測PE亦只係6.7倍！
重有，佑威分拆納米業務，料明年首季可成事，市值應該會大過現時成間公司，對股價會有好大刺激。
郭兆誠