日本性感女星森下千里經常都幫雜誌拍攝性感寫真，咪睇佢身材咁弗，就以為佢梗係日日食條菜減肥，原來森下好鬼大食㗎！
最近森下接受日本雜誌《sabra》邀請，去沙灘拍攝咗一輯三點式靚相，百厭嘅佢喺車廂入面扮換衫，點知影影吓相就忍唔住肚餓，着住套紅色比堅尼去附近拉麵店醫肚！睇見森下食拉麵食得咁happy，真係連我羅拉都覺得肚餓呀！
森下話雖然佢早排學烹飪，不過𠵱家正值上位搏殺期，平日既要拍攝寫真集又要上電視台做綜合節目，點會有時間留喺屋企慢慢煮飯吖，所以佢多數都係出街食。不過森下有個怪癖，就係唔多鍾意同朋友一齊食飯，有時佢會一個人去食迴轉壽司，又或者去食佢最鍾意嘅中國菜。
據森下講，佢試過有一次自己去食烤肉，原本打算一邊食一邊靜靜咁睇劇本，點知睇睇吓突然有個男人行埋佢身邊向佢搭訕，真麻煩！經此一役，森下話以後都唔會一個人去食烤肉喎。