港股急升過後，昨遇上回吐壓力，恒指收報13331，跌28點，成交138.2億元。和記電訊（2332）臨到快截止認購才宣布將招股價範圍由6.52-7.55元，調低至6.01-7.04元，擺明係認購反應唔多理想，所以要降低招股價範圍以吸引芬佬接貨，和黃（013）因而跌1.2%至61.50元。
不過同時招股的中國電力國際（2380），市場傳出反應熱烈，與和記電訊成一大對比。何解呢？芬佬話，和記電訊今次悉數賣舊股讓大股東和黃套現，環球2G業務增長前景令人懷疑，加上系內和記環球（757）曾令捧場客輸錢，股民明白買超人系股份唔係賺硬，當然唔再亂咁捧場。不過，今次保薦人係往績紀錄唔差嘅高盛，認購和記電訊的機構投資者，實力應該唔弱。
至於中電國際，因為招股PE較現有電力股的PE低，前景亦唔錯，反應自然較好。由於此股具有併購概念，兼且國內電力需求量年年大增，缺電情況嚴重，發電仍屬高增長行業，燃料價格上升時又獲得政府政策保護，再加上有大量中資捧場，認購情況自然比和記電訊理想，但中電國際好難掀起如今年初的中資股新股認購熱潮，因為到目前為止都見唔到有大量外資流入香港。
中資股噚日雖然唞氣，但汽車股卻逆勢向上衝，其中華晨中國（1114）勁升12.88%至1.84元，成交達3.35億元；慶鈴（1122）升3.7%；駿威（203）升2.73%。不過，阿虎聽聞國內汽車雖在黃金周減價促銷，但銷情仍然一般，汽車股噚日逆市勁升，有點令人莫名其妙。
阿虎