恒指升1.8%，若認為升得過火，唔該睇吓南韓、菲律賓、日本，佢哋分別上升4.2%、3.6%、2.7%。閒話表過，摷搵銀窩輪最實際。
新地C輪：信置（083）升6.9%，新世界（017）升4.1%。新地（016）升得1.4%，好失禮，好快跟大隊上去。
炒新地C輪，有兩件對象。2252明年2月夠鐘，輪價52仙，溢價6.3%，槓桿率14.3倍（有效7.5倍），開始熱身，啱搏殺型炒家。數據靚，則係隻2151，請睇走勢圖裏便嘅資料。
電盈C輪：冇得升嘅恒指成份股有兩隻，電盈（008）有份。盈大（432）就快宣布發展機樓詳情，升4.7%。電盈有機會跟個仔上去，係時候收集C輪9814。隻輪明年1月到期，輪價46仙，溢價5.8%，槓桿率11.2倍（有效6.8倍）。
滙控C輪：昨日推介嘅滙控C輪4441，跑贏4445同2172，2.9%溢價仍然同4445嘅4.1%溢價有距離。溢價若然相同，4441值68仙，較現價52仙高出好多，水位令人流口水。
另1隻滙控C輪9772亦係令人流口水，12月中到期，輪價1.03元，負溢價1.1%（計埋正股下月派多次息，仍然負溢價0.3%），槓桿率12.2倍。既然冇溢價，所以有效槓桿率亦係12.2倍。滙控（005）郁1元，佢郁10仙，滙控郁2元，佢郁20仙，比例就係咁。滙控昨日升破123/124元牛皮區，成交金額34億元，破位後有嘢睇，一兩蚊一兩蚊咁向上移動，可能閒過立秋。9772冇溢價，有爆炸力，啖啖肉。
章盛