新車速報:江芷妮:鍾意佢可愛<br>試坐豐田7人車

新車速報:江芷妮:鍾意佢可愛
試坐豐田7人車

「離遠睇重以為係好似Echo嗰類車仔㖭,原來有7座位咁犀利!」、「咁細架車載7個人諗住好迫啦,上到車先知呢架Sienta個車廂都幾闊落、坐得幾舒服喎……咦?重勁多地方擺濕碎嘢口忝!」估唔到駕着辣車寶馬M3「隆隆」聲轟到試車地點的江芷妮(Cherie),對呢架1500cc、110匹嘅小型7人MPV都充滿好奇,重即時跳上車話要試吓架車爽唔爽,夠唔夠力先。
「喂!試還試,咪同你架M3比喎!」

記者:馬慶武 攝影:周旭文

「外形Cutie坐得舒服」
擁有7年牌齡的Cherie,第一架車係標致206,之後新甲蟲、Z4、到剛購入三個月的M3,愛驅愈來愈辣。
「因為住得離公司較遠,返工放工都要行經唔止一條高速公路,所以對汽車嘅性能要求愈嚟愈高。」
Cherie話自己好鍾意揸車,去元朗買老婆餅、或者山長水遠送朋友返屋企,都係想趁機遊吓車河。今次試過豐田SientaX之後,就話最鍾意佢外形Cutie,身手靈活坐得舒服,而且重可以載到7個人,又唔會覺得架車太長太笨,假日又可以一家大細驅車遊玩,爽喎!

■Cherie話最欣賞Sienta車身Cutie的骰,但係坐喺車廂內又絕無侷促感覺。

「有電趟門上落方便」
車頭一對圓圓頭燈,配合全車包圍,Sienta外形絕對討人歡心。
「睇外表唔似7人車,幾可愛,揸出街都唔會好老餅咁。」
Cherie最估唔到係呢架車仔竟然裝有電索趟門。
「連1500cc嘅車仔都設有電趟門,上落好方便,而且車內空間比想像中大好多。」
Sienta左邊趟門有電動開關,2+3+2三排座椅以頭、中排較為寬敞,身形「細粒」啲嘅乘客就應該坐後排。另外中排座椅亦可以前後滑動,令後排乘客更易上落,尾座椅更可以摺叠收藏於中排座椅底部,騰出更大載物空間。

■尾排座椅可完全收藏在中排座椅底,再把中排摺起推前,令Sienta的載物量不比貨Van少。

■三座位中排座椅,只須拉動椅旁的手柄便可把座椅推前,以便後座乘客上落。

■後座兩旁有手枕及杯座,但空間較狹窄。

軸距短迴轉矯捷
1500ccVVT-i引擎,輸出力量足夠,加速亦算明快,不過這只是載住3個人時嘅感覺,相信若然7位成年人上晒車,便不可要求有敏銳起步、凌厲加速,所以建議尾排兩個座位都係要嚟看吓門口算喇。
「OK啦,𠵱家載住3個人都算夠力,不過如果載滿人,上斜可能要慢慢嚟喇!」
揸開M3嘅Cherie覺得載住3個人嘅Sienta性能及格,轉向靈活,當然啦,Sienta最小迴轉半徑5.2m,而且軸距只有2700mm,對於一部七人車來說,身手已算非常矯捷喇!

■太陽擋頂分為三部份的雜物匣,旁邊的可用來放地圖、記事簿,中間的則專供擺放眼鏡之用。

■杯座、煙灰盒及小型雜物匣設於中控台之下,另外座椅中間則可放銀包、MP3等隨身物品。

■中排平台底揭起後亦可擺放大量雜物。

■前排乘客位有上揭式手飾箱,下方亦加設雜物匣,一點空間也不浪費。

■前排乘客座椅底部設鞋櫃,落雨天啱晒!

■圓圓的頭燈很可愛,連着一旁的指揮燈更有潮流感。

■車頭又肥又圓的泵把擾流,令車頭賣相更加趣致。

■直列式尾燈連指揮燈,配上橫間燈罩設計,夠型格!

■前排座椅中間設有獨立手枕,波棍設於中控台旁位置。

■三幅式軚環非常簡潔,和豪華7人車滿布按鍵的軚盤分別極大。

■一體式中控台採用單一色調,集合了冷氣、音響、表板、波棍。

江芷妮後話
Cherie最新愛驅M3改到咁惡,原來係購自友人的二手車。已經有電單車牌3個月嘅Cherie重話:「我真係幾鍾意揸車,𠵱家說服緊媽咪,想買番架綿羊仔兜吓風,最多保證唔上Highway吖?!」

其他7人MPV推介
本田Mobilio1.5
外形較潮較有型,而且配上雙電趟門,設備完善。最大馬力輸出只有90ps/5,500rpm,扭力13.4kgm/2,700rpm,較遜色。

車價:$139,000

日產Cube3
採用1386cc直4引擎,性能同級比較中規中矩,外觀都一樣Cutie,亦係較冷門的選擇。

車價:$165,000起

ToyotaSienta1.5XProfile
引擎:1496cc直4DOHC
馬力:110ps/6000rpm
扭力:14.4kgm/4400rpm
傳動:SuperCVT無段變速自動波,前輪驅動
懸掛:(前)柱式獨立(後)拖曳臂
制動:(前)透氣碟(後)鼓式(ABS)
輪胎:175/70R14
尺碼:4100×1695×1670mm
軸距:2700mm 車重:1210kg
平均耗油:19.0km/L
車輛提供:富利堡汽車(23330747)

■新加設的尾翼為Sienta增添活力動感。