紅魔鬼曼聯之風席捲全球，今次還特別看中了香港這個地球上的「一點城市」，建立亞洲區首間足球學校，並以曼聯當年訓練出萬人迷碧咸、傑斯、史高斯、尼維特兄弟等超級球星的絕學，親身傳授給有足球天份的小朋友。趁着足球學校首度「開操」訓練，就帶大家尋找誰是明日曼聯之星吧！
記者：何善華
攝影：陳智良
一班10歲唔夠的小朋友，別以為大家互不相識會很「禮讓」，一落到球場就立即變得龍精虎猛，實行「以波會友」。懶理對方的膚色是黃色、白色抑或黑色，訓練期間依然有講有笑，但一到分組比賽就盡顯「落場無父子」的本色，施展不同曼聯球星的看家本領，好似以傑斯仔嘅盤球扭過對方，再用雲佬的射術入網，看得觀眾席上的家長津津樂道，忍不住替愛兒打打氣，歡呼鼓勵。
曾在曼聯及英格蘭國家隊效力的著名球星德士貝利（MikeDuxbury）為今次曼聯足球學校的主教練，他表示香港小將的技術不俗，但性格卻較英國同齡的小朋友內向及怕醜，所以訓練學校其中一個目的，是提升他們的自信心。「單論球技，本地球員絕不比外國人輸蝕，但足球不是只講技術，團隊紀律更加重要，當然個人體能及思維都是關鍵所在。」一旦學員給教練挑選出來的話，更可免費到英國曼聯青訓學校舉辦的「曼聯足球學校精英大賽」受訓，觀看曼聯主場的聯賽賽事。
在首日開操前，教練團（共有5位教練，包括主教練德士貝利及羅斯爾、以及教練張寶春及陳國賢等）先向在場的參加者訂下「訓練規則：尊重、溝通、紀律、享受及公平競賽」，更揚言有好的紀律才可以建立團隊精神，將曼聯一隊的團結隊風套用在現實生活中。訓示過後便將小朋友以不同年齡及技術，分拆約每12人一組，由一位教練帶領及指導訓練。首先傳授足球基本功如「走動帶球」及「急停轉身」等，隨後小朋友立即散開各自練習個人基本技術，然後再做一些集體練習以培養學員之間的默契。一次過做75分鐘的帶氧運動的確唔係人人都得，小朋友嘗過此等滋味，就明白到當一個成功的足球員，是要付出不少氣力和精神。
教練話盤球首先要雙眼集中視線，望準皮球，然後扭擰蛇腰左右擺動，就好似傑斯盤球般「逢人過人」。
射球不一定要勁度十足，只要能夠將足球送進龍門網內就可順利得分。即使面對空門都要擺番個靚姿態「卧射」入網。
一切由基本功學起，二人短傳看似輕鬆簡單，但怎樣運用腳腕位置傳送，背後實有一定學問，勤力操練先可以百分百短傳成功。
「長傳急攻」一向是英式足球的傳統踢法，做得後衞當然要懂得遠距離傳送致命又準確無誤的長傳啦！
控球可以控制到皮球「聽教聽話」，實非一朝一夕學成的。如何可以利用心口控定足球，可多些參考史高斯落場時的表現，從中偷師。
別以為球場內的小朋友是足球訓練學校的主角，是明日英雄！每位小朋友背後，在球場以外的觀眾席上不都是有一個「媽」？她承擔了小朋友的辛勞、飲食及精神提升能力，踢波都可以輕鬆自在，現在的小朋友多幸福呢！
筆者印象中的第一位女球迷，是漫畫《足球小將》內的啦啦隊隊長早苗。2004年的今天，一樣有不少小女球迷親自到場為明日曼聯之星打氣。
踢波出汗兼口渴絕對係正常之事，幸得身邊的祖母大人忙加照顧一番，這位小朋友認真羨煞旁人，連踢波都有專人服侍，派頭可以與碧咸媲美。
「媽咪唔該快啲抹汗啦，我要落番場啦！」小朋友在教練給予的五分鐘休息時間內，做齊抹汗、飲水、唞大氣等狀態提升方法，目的都是想一會落場唔好失威。
呢位家長非常醒目咁帶定攝錄機，務求第一時間見證亞洲首間曼聯足球學校的首日開操情況，捕定靚位連忙將小朋友的一舉一動記下來。
正所謂「球場如英雄地」，眼見愛兒當日狀態夠Fit，一口氣入咗兩球，重唔即刻用相機拍下入球一刻的情景！無帶相機，一於用手機相機「以相為證」。
陳先生：「知道個仔Justin鍾意碧咸，所以帶佢嚟學吓踢足球。我覺得這裏的訓練系統設計得幾好，教練和學員的比例好均勻，相比起體育學院及坊間的足球訓練班，訓練球場的面積已算很大。」
盧先生：「一班小朋友分開四組訓練，情況有點混亂，如果分組前視乎小朋友的身高、技能再仔細分組就比較公平，氣氛好融洽，寓學習足球之餘亦可多聽多講英文，唔錯！」
香港曼聯足球學校
內容：曼聯轄下教練在港訓練8至15歲男女青少年，每完成一個學習階段，每位學員將獲發證書及個人技術評估報告。
日期：2004年10月至2005年3月（大部份課程已開班，部份課程尚餘學額；另會增設新班，詳情稍後公布）
教練：羅斯爾、德士貝利（歐洲足協B級教練證書）及6名香港教練（亞洲足協C級教練證書）
上課地點：跑馬地香港足球會及屯門嶺南大學
費用：$4,500（平日）、$5,400（周日），每周一節，每節75至90分鐘，共20周。
查詢電話：23142114
網頁：
