容祖兒（Joey）初出道時樣貌平凡，標榜以歌會友，但近年走紅後的她外貌明顯有變化，鼻頭較尖，下巴變長，看來順眼漂亮，成為圈中話題之餘，更惹來整容疑雲，連陳奕迅都懷疑她整過容。昨日Joey承認自己較初出道時漂亮，但卻表示純粹是減肥效果及化妝技巧。
容祖兒初出道時一直標榜是實力派女歌手，皆因她樣貌平凡不漂亮，更有翻版彭羚之稱，但自Joey走紅後，近年其外貌愈見好看順眼，因此成為圈中話題，不但不再像彭羚，連與她有如餅印般的容媽媽也不再那麼相像。而Joey樣貌的改變並非一朝一夕，但近日其樣子與初出道時明顯對比極大，有指她的鼻子尤其與前不同，鼻頭比過去尖，腮骨位置也似乎尖削了，下巴也變得尖而長，連出名的大牙肉都沒有以前那麼大，遂惹來整容疑雲。
昨日Joey與李克勤齊齊到尖沙嘴出席《拉闊音樂會04壓軸》記者會時，大會要求二人寫出對對方的第一印象，克勤寫道：「大牙肉?靚聲」，Joey則寫：「樣子很寸，但幾nice」。而談到整容疑雲時，Joey坦言連好友陳奕迅都曾經懷疑她整容，她亦承認覺得自己變得漂亮，但卻否認有整容，只謂是人瘦了及化妝技巧所致。
Joey昨日接受訪問時表示不介意被叫做大牙肉，因感覺很可愛，提到她入行時與現時的樣子明顯有分別，Joey從容不迫地微笑着說：「因為我瘦咗嘛，塊面冇扯得咁行，我冇時間整容，整容要好多時間㗎，我以前對眼生得開啲，鼻又扁，口又橫，𠵱家瘦咗啲咪集中番囉。」
Joey又謂不會因被懷疑整容而不開心，她說：「啲人覺得我靚咗重開心啦，冇用錢整過都靚咗喎，畀我整嘅話我想抽眼袋，不過唔夠瞓又會有返㗎，我個樣上鏡唔夠靚，好多謝髮型師同化妝師，將我個樣整得好有立體感，個化妝師幫我化妝化得耐，技巧都愈來愈好，我唔怪人會有咁嘅誤解，我睇返以前啲帶都覺得自己甩皮甩骨咁，髮型又唔啱，我自己都覺得自己靚咗㗎。」
Joey更坦言連陳奕迅都曾經懷疑她整容，她說：「佢見到我都走嚟摸吓我對眼同個鼻，佢都以為我整過。」問Joey平日拍照有否以電腦執相將自己變靚，她說：「冇執㗎，我最憎人執走我眼袋，成個蠟像人咁，總之我𠵱家有信心咗，順眼咗。我如果整就削牙肉，會整埋雙眼皮，我以前搽眼影都搽啲白色淺色嘅，𠵱家加少少黑色眼影，就有雙眼皮，化妝技巧真係幫咗我好多。」
另一方面，克勤表示指Joey是大牙肉純粹開玩笑，問他是否認為Joey曾整容？克勤說：「唔信呢啲嘢，個個女人靚咗都俾人咁講，一個女人肥咗同瘦咗都差好遠。」有指人瘦不會鼻變高，克勤則說：「我冇認真去睇，唔係好覺，相可以執㗎啫，我都可以執到皮光肉滑啦，少少出入係無可厚非，我覺得Joey瘦咗囉，我唔會贊成或反對人哋整容，但要衡量係乜嘢類型藝人，觀眾鍾意睇靚嘢，外國藝人就整得好嚴重，一睇就知。」
克勤更謂整容要有學問，最厲害是整了也不覺，要慢慢整，他笑言自己最想增高，不過樣子不太醜也沒所謂了。
採訪：李珮洳
攝影：陳偉權
