股權易手無耐的中華城市燃氣（603），曾話過想引入策略性投資者，噚日開市唔夠1個鐘就停牌。經紀陳話，市場傳聞隻股會以發行可換股票據形式，引入日本投資者，據講涉及金額唔會大，但這只係第一步行動，稍後重有行動跟尾。
中華城市燃氣噚日在開市44分鐘內，股價一度高見2.5仙，停牌前2.2仙，升10%，成交股數1.95億股，金額448萬元，並唔係乾升。
中華城市燃氣近年股權易手過好幾次，起初由日本仔話事，之後變咗香港人揸旗，然後再到大陸投資者話事，玩咗一陣又賣番畀舊時行政總裁，但似乎乜人話事都好，都係好鍾意用可換股票據呢一招集資，或者係票據認購人，進可攻退可守，有足夠保障，但對一般小投資者嚟講就比較唔多透明，因為唔知人哋幾時會換股出貨。
另外，經紀黃早排推介的鞋股永恩（210），噚日突然發威，急升20.29%，收0.83元，成交股數2855萬股，金額2166萬元。經紀黃話，雖然隻股盤數靚又獲芬佬垂青，但升得咁急，始終有風險。
慕容小初