入會、畀錢、定期睇波……原來唔少人不知不覺就做咗「曼聯教」嘅信徒。中大文化及宗教研究系系主任賴品超噚日同八方介紹個名為「新興宗教運動」嘅新學科，笑住話𠵱家啲英國人連彌撒都唔去，反而定時定候去捧曼聯場，其實都係宗教現象嘅一種。副教授龔立仁就話，近年愈嚟愈多新興宗教，所以學系先開一個咁嘅學科，介紹吓邪教、異端、水晶、UFO、風水一類嘅文化現象。除咗理論之外，學系重會安排啲學生去啲水晶店度同老闆吹吓水，實地了解吓。賴品超又話，喺外國將文化同埋宗教一併研究已經係大趨勢，澳洲甚至將另類宗教列為學位課程。𠵱家中大講師中，有啲係另類宗教嘅教徒，又請咗一位研究法輪功嘅學者嚟做訪問學人，咁嘅陣容睇怕都夠晒吸引力。
傳真︰2623-9278
電郵︰