雖然樓市火熱，美聯報告，三十五個指標屋苑，上周只得二百一十宗買賣，比前周少近兩成，好彩重守得住二百大關。不過，喺旺市中，冇成交嘅屋苑反而多咗，有五個，前周只有一個。
美聯研究部經理張蓓蕾話，五個冇成交嘅屋苑，三個喺新界區，分別係大埔康樂園、屯門新屯門中心，同粉嶺花都廣場；市區得又一村又一居同柴灣杏花邨。咁大個屋苑一個禮拜都冇成交，都幾令人意外。
張蓓蕾解釋，成交減少嘅原因，係中秋同國慶兩個假期，唔少人出外旅遊，搞到少咗人買樓。但佢話，因為今個禮拜政府賣地，預期以理想價成交，今周二手樓市銷情可以保持高水平。
樓市好景，業主換樓意欲大增，而且決定時間也較快。美聯區域經理謝志華話，西灣河鯉景灣業主，以三百一十五萬元，賣出手上的怡昌閣中層Ｂ室後，唔夠一粒鐘，即用四百三十八萬，購入隔籬嘅新盤嘉亨灣六座中層Ｆ，六百七十五呎，呎價六千四百八十九。
另外，中原高級分行經理余志文話，馬鞍山新港城一名兩房單位業主，先以一百二十五萬，沽出自住單位，四個鐘頭內，決定用二百零九萬，買入同屋苑四期Ｊ座高層三房單位換樓，面積近七百呎，呎價近三千。
美聯營業董事李志成（圖三），十月一號正式過檔系內香港置業，升做執行董事，佢話，𠵱家負責全公司前線拓展，配合擴充大計，所以預咗三年都唔會有大假放；嚟緊開分行，率先集中荃灣同深井一帶。嗰區有唔少大盤相繼推出，開到分行，應該唔憂冇生意。
李志成話，不時都要留意，睇吓邊度有位啱開分行，加強番二手代理業務。另外，梗唔少得同發展商打關係，好似噚日咁，同俊和傾完清水灣道8號開賣事宜，跟住趕去同盈大開會，聽取貝沙灣嘅銷售安排，認真唔得閒。
中建電訊噚日出通告，話上個禮拜二，即中秋當日，以接近九千一百萬，買入淺水灣道五十六號，一個四千一百呎複式，呎價兩萬二，平咗上個月示範單位呎價新高紀錄。
單位現連月租十六萬租約，租期至年底，租金回報雖然只有兩厘幾，不過中建話，買入作長線投資，因為睇好豪宅前景，相信物業可以提供可觀投資回報。
前稱御苑嘅淺水灣道五十六號，雖然已有十年樓齡，不過，落成之後一直只租不賣，加上區內極少臨海而建嘅低密度屋苑，唔少富豪都想買番間投資保值，拆售唔夠一個月，火速賣出十伙，套現八億。
中原為新地爵悅庭搞「中秋花燈對聯比賽」，第一件得獎作品終於誕生。
中原嘅上聯係「金風清，碧海晴，紅日銀輝映照爵悅庭」，結果共收到一百五十句下聯，經新地周國賢同中原董事千挑萬選，一個同樣住喺荃灣區嘅參賽者，以「設計精，環境靜，荃灣新地展現香港情」，成為第一個得獎者，獲得五千蚊獎金。
今次嘅比賽，一共設兩個獎項，而另一個，幾位評判重要花啲時間考慮至得。
城中著名豪宅薄扶林貝沙灣，第一期業主近日陸續收到入伙通知書，呢個係盈科大衍（前身電盈）喺地產界第一個誕生嘅住宅項目，過往盈大竭力為樓盤營造豪華高貴品味，示範單位同售樓處，搭建得有咁豪華得咁豪華，今日盈大就帶傳媒參觀呢個現樓物業，展示吓物業質素。
聽講，盈大就快開賣南灣第七至九座，賣樓話事人顏金施話，打算只賣二十至三十伙，餘數明年至賣，到時分層單位每呎一萬蚊。配合推售，今個禮拜五晚，現場搞名人之夜，推介新單位之餘，又可睇現樓。
灣仔太古廣場三期呢幢巨無霸落成後，同區蚊型商廈單位原來都受惠，成交多咗。中原高級營業經理林家安話，皇后大道東金鐘滙中心，有兩個蚊型單位易手，三樓五室，三百九十五呎，成交一百萬，同層另一個三百九十呎六室，以同價沽出，兩個單位買家同樣做建築行業，買嚟自用。若果以呎價計，二千五百幾，平過住宅。
金鐘滙中心有玻璃幕牆，外形都唔差。
蘭西
電郵地址：
