《金枝慾孽》上周六晚播映大結局，最高收視高達四十一點，撼低《棟篤神探》成為今年劇集結局收視之冠，監製戚其義昨日接受訪問時表示，他認為四位女角當中，以黎姿表現最佳；而佘詩曼則提議開拍時裝版《金》劇，講述辦公室鬥爭。
無綫劇集《金枝慾孽》上周六晚播出大結局，平均收視三十九點，觀眾人數二百五十六萬，而最高則有四十一點，觀眾人數為二百六十九萬，打破《棟篤神探》結局篇平均三十五點及最高三十九點的收視紀錄。
《金枝慾孽》的監製戚其義及編審周旭明，昨日到港台接受訪問，戚其義強調四位女角絕無爭戲份及不和，至於哪位女角演得最好，他說：「個個都好，如果一定要揀就會揀黎姿，因為佢喺劇中起伏好大，不過我覺得佢哋一齊爭奪女主角獎都幾殘忍，最好就係四個一齊攞啦。」
另一方面，佘詩曼昨日在銅鑼灣接受訪問時說：「我之前冇諗過收視係幾多，攞到口碑已經好好，今次嘅收視我當係獎勵。」
阿佘透露若《金》劇開拍續集的話，她建議開拍時裝版，佘詩曼說：「冇咁快知開唔開續集，但套劇入面個個死晒，開前傳好難寫，啲角色未識又點爭呢？時裝版會好啲，我諗會幾好玩，可以寫office鬥爭，我聽啲朋友講，話寫字樓入面弱肉強食，時裝版可以反映到人性嘅可怕。」
無綫外事部助理總監曾醒明昨日亦說：「《金》劇大結局係九八年到𠵱家為止，喺星期六同星期日所播出嘅結局篇之中最好成績嘅一套，日內我哋會舉行大型祝捷會，而贊助商喺盆菜宴當晚亦加碼捐出五萬，換言之合共為公益金籌得大約二十萬善款。另外，我哋今日收到十幾個觀眾電話，要求無綫開拍《金》劇前傳或者續集，但無綫目前重未有決定。」
此外，有報道指無綫明年開拍《棟篤神探》處境劇，監製徐正康昨日在電話中否認說：「出年處境劇係我負責，但一定唔係拍《棟篤神探》。」
採訪：朱倬誼、卓美娟
