《南華早報》嘅財經專欄作家JakeVanderKamp素來對證監會冇乜好感，但係對於證監會喺九月二十八日發表嘅收緊孖展借貸市場意見，Jake就舉手贊成，並且認為證監會執行董事張灼華已經走上擂台，另一位好可能上擂台同張灼華砌過嘅，代表小經紀利益嘅就係詹培忠議員，嚟一場投資者vs小經紀利益大戰。
會唔會呀？張灼華大戰詹培忠？你估係阿里大戰傅利沙吖？還是阿里對豬木？左丁山就認為唔會打嘞，詹培忠醒目到飛起，絕對不打無把握之仗，而且一定懂得選擇擂台，選擇適當時候、適當地點嚟打一場有勝算之仗。收緊孖展呢回事，已經搞咗成年，證監會與業界人士開過多次會議，聽咗好多意見，先至建議推出兩項新核心措施，尊貴的詹議員點會貿貿然挑戰呀？佢嘅銀色子彈（silverbullet）唔會為啲小事而浪用嘅。
兩項新核心措施係：（一）規定轉按上限為孖展總額的一點三至一點五倍；（二）提高抵押股票嘅指定扣減率。轉按就係散戶投資者放喺證券行嘅股票（譬如你用百分百現金買咗滙豐，為方便買賣，冇攞股票返屋企放在夾萬，而留在你嘅戶口內），俾證券行拎咗去銀行抵押借錢；以前「正達事件」令散戶損失慘重，就因為正達轉按得太多、太勁。國際做法係完全禁止經紀將無借款客戶嘅股票轉按，香港證監會現在建議收緊，限制轉按上額，冇完全禁止，已照顧到本港嘅經紀，如果咁都有人反對，實在罔顧散戶投資者利益，為咗搵銀，不顧良心。