著名音樂雜誌《Ｑ》最近又搞咗個史上最偉大樂隊選舉，入到頭五十大嘅組合基本上都係家喻戶曉嘅名字，而其中能夠脫穎而出榮登榜首嘅就係英國六十年代經典樂隊PinkFloyd，相反不朽樂隊披頭四（TheBeatles）就只係位列第八位，結果令人意外。
原來呢個選舉係根據樂隊嘅大碟銷量、演唱會以及大、細碟喺流行榜逗留時間等因素所選出，冠軍嘅PinkFloyd歷年作品佔據流行榜頭四十位接近一千個星期，難怪佢哋可以擊敗亞軍嘅LedZeppelin同季軍嘅滾石樂隊（TheRollingStones）。至於愛爾蘭勁旅U2同皇后樂隊（Queen）就分列四、五位，即將來港嘅TheEagles就排十一位。
至於要數九十年代紅極一時嘅英國樂隊Oasis，佢哋就穩據第十三位，而呢兩年當時得令嘅Coldplay同TheDarkness都未能入圍，相反流行組合包括BackstreetBoys、SpiceGirls同'NSync亦分別入圍排二十二、三十三同四十四位。
另外由電影雜誌《TotalFilm》推選嘅史上五十大英國電影，入圍名單亦多為五、六十年代作品，其中年前曾被重拍成《義膽流氓》、由米高堅（MichaelCaine）主演嘅七一年電影《GetCarter》位列冠軍，《迷幻列車》同《沙漠梟雄》分列三、八位，《四個婚禮一個葬禮》排二十六位，反而《烈火戰車》同《甘地傳》等名作就意外落選。