長毛挑戰權威，更改立法會所謂嘅「誓詞」，加入效忠民主自由人權及「中國人民」、香港人等，咁又踩到土共條尾，引起不少謾罵之聲。
長毛早前喺維園，反擊維園土共阿伯，差人焗住將一名老人家帶署問話，其後呢班惡人，瘋狂氣燄有所收斂，證明長毛不負選民所託，維持公義。
長毛今次又玩嘢，效法孫大聖喺閻王殿私改生死簿，單方面對所謂嘅「誓詞」作出增刪潤飾及補充，冇乜嘢話唔得，因為中方自己時時都講，基本法係睇「精神」，條文要考究「原意」，唔效忠中國人民，唔通效忠台灣人民？
長毛冇話要效忠英女皇、布殊、普京，亦冇話效忠呂秀蓮，佢話效忠中國人民、人權、民主、自由、乜有講錯咩？咁都包容唔到，喊打喊殺，阿胡嘅「九三○講話」有幾多誠意，咪一眼見晒？所以長毛咁樣搞法，咁快拆穿個雞棚，又係有少少殘忍，話到明蜜月期，可唔可以畀啲香港人陶醉番耐少少咁呢？
加埋長毛開咗咁嘅先例，若然俾佢成功，相信最「揼爆」嘅就係我哋A1號。早知誓詞係可以就住信仰好似瘦身隆胸咁任意抽脂谷大嘅，阿董喺宣誓就任特首嗰陣，就可以喺效忠中華人民共和國之外，加多句效忠埋自己個老婆，誓言喺任內，無論上京述職或去珠三角視察，都唔會去滾喇！香港地有幾多個師奶黃面婆有咁嘅福份，喺五星旗下宣誓做特首嗰陣可以搭多嚿豬頭骨，可以公器合法私用，電視直播，在全世界人面前順便向自己老婆宣誓埋永不叫雞。
愛佢三百六十年㗎？有老公係咁，邊個女人唔冧？所以今次長毛申請司法覆核，內心最想長毛勝訴嘅，就梗係唐唐、煲呔、太子章等三大熱門嘅老婆喇！
傳真︰2623-9278
電郵︰