皇家馬德里又輸波，重要輸畀被評為近十年最差嘅拉科魯尼亞，我求大俠前晚捱通宵睇直播谷氣之餘，又有啲心酸；皇馬再係踢成咁，真係趕客，以後冇人睇佢哋直播賽事。
前晚皇馬對拉科同時間有羅馬對國米，一直都係崇尚進攻足球嘅西甲會好睇啲，所以我求大俠睇咗半場國米都轉台，睇吓皇馬會唔會好似歐冠盃對羅馬下半場時，踢番出進攻足球水準。點知，成班星級球員起腳射門唔中框，施丹同費高好想突破對手，但又有心無力，唔知想點。拉科已經唔係踢得好，皇馬班球星一球都入唔到，我求大俠睇到冇心機，轉台睇番羅馬對國米；結果兩隊鬥攻，場波下半場有四個入球，淨係列高巴左腳怒射夠晒睇頭。
我求大俠唔係落井下石，但係皇馬重係咁踢法，球迷睇直播真係唔好有期望班球星重可以踢到識飛之餘，肯定流失唔少擁躉。
修咸頓嘅臨時領隊域尼，原來作個教練牌到出年七月先攞到，以佢𠵱家嘅資格，只能教三個月波，即係話十二月就冇得教。雖然修咸頓已同域尼上訴，且勝訴機會好大，但域尼好風趣咁話：「我接手球隊後六場聯賽得兩分，莫講話十二月，六場後我重係唔係教修咸頓都未知啦！」
大家估下喺二○○六德國世界盃嘅各項運動中，有邊樣飲品唔畀賣？係牛奶！因為我求大俠睇到德國《南德日報》報道，話由於可口可樂公司係○六世界盃嘅官方贊助商，因此佢哋負責提供或出售所有○六世界盃活動嘅非酒精飲品；所以喺呢啲場合，連牛奶都唔畀賣，咁都得？
皇家馬德里今屆表現麻麻，連佢哋嘅球員都黑仔埋，好似「大哨」朗拿度咁，佢𠵱家唔單止要養傷，重惹埋官非。原來朗拿度有鋪買別墅癮，喺歐洲唔少地方都有別墅；不過，朗拿度嘅前經紀馬田斯就控告佢，話「大哨」喺買馬德里豪宅中偽造文件，搞到法庭要畀傳票朗拿度。
羅馬同國米打和三比三確好睇，但我求大俠對羅馬前鋒卡斯辛奴嘅態度就睇唔過眼；佢上陣時表現麻麻，被換出時黑晒口面，連波都唔睇，走咗去更衣室，冇厘團隊精神。雖然羅馬新教練迪尼利賽後撐佢，話佢表現唔錯；但迪尼利一向以紀律嚴明見稱，相信唔會忍得卡斯辛奴幾耐。