自由黨田北俊上星期上京見領導，但影大合照嘅時候霸唔到頭位，結果要上山頂企，有傳媒話佢當堂「面黑黑」。八方噚日見田少，佢澄清話自己上山頂絕對冇面黑，大家都知佢係有講有笑嗰種人。田少話，佢哋嗰日喺大會堂見領導，要企成半個鐘先至有得影相，等候期間耐唔耐梗係會無表情，唔通會無端端自己對住自己笑半個鐘咩？
雖然冇得同領導人握手，但田少睇嚟唔多介意。八方問田少，企咗喺山頂咁遠無得同領導人握手，係咪少緊個畀領導人祝福（當特首）嘅機會呢？田少好似讓賽咁同八方講：「我有好多機會上京同領導人接觸啦！」
唔知田少係咪想講埋，握少次手都無所謂啦，我嘅民意支持贏晒呀！咁又係，胡溫𠵱家講以民為本，有民意基礎嘅直選議員應該有優勢。
（圖）田少話自己大把機會上京同領導人接觸，咁有信心，你係得嘅！
傳真︰2623-9278
電郵︰