新一屆立法會聽日就正式開鑼，啲候任議員亦陸陸續續蒲頭，白鴿黨主席李柱銘經過悠長假期之後，星期日亦由法國飛返香港，噚日已經精神奕奕坐喺立法會，向角逐連任主席嘅范徐麗泰發炮。
馬丁自從大比數勝出當日起，成日為何秀蘭因八百票輸畀蔡素玉一事抱有歉意，覺得白鴿黨做得唔夠好，鑄成大錯。不過，好多人就覺得佢唔應該咁睇呢個問題，始終選民唔想馬丁輸就最清楚不過啦。馬丁選舉後同班老友飛咗去法國，人哋就試酒，佢老哥就試食，聽講因此重咗好幾磅。
馬丁今次選舉，真係有史以來最辛苦，而且壓力好大，所以去放假唞吓係好事。不過，唔知係咪坐飛機同長途巴士唔小心，扭傷條頸，痛到差啲要飛返香港，好彩有個做醫生嘅團友教佢戴頸箍，頂住一陣。佢噚日一早去個脊醫度擰咗兩下，先至好番晒。
選舉時做咗好多承諾，𠵱家要跟進，馬丁噚晚去海怡半島，今日去尖沙嘴，真係有排忙。
（圖）馬丁話整親條頸，唔講重以為佢係拉票勤力得滯搞到受傷。 資料圖片
傳真︰2623-9278
電郵︰