呢個影壇其實有唔少風流紅星，其中一位自大紅星雖然受咗唔少教訓，但一樣冇變，佢最鍾意搵老友介紹啲妹妹仔畀佢食免費餐，但另一位好孤寒嘅紅星喺呢方面就比較君真，起碼佢召妓會自己埋單，費事有手尾跟。
同呢位孤寒紅星拍過拖嘅女星，都對佢冇乜好感，同佢分手都因為佢太爛滾，話說佢同性感女星拍拖嗰段時期，兩個人已經過緊同居生活，有日女星原本要開工拍戲，講明要拍通宵先收得工，孤寒紅星見有一晚時間，竟然帶咗個妓女返屋企鬼混。哈！點知女友提早收工返屋企，當佢聽到開門聲，只好叫個妓女爬水渠走。
雖然呢件事可以瞞天過海，但後來佢又俾女友發現佢偷食，所以要求同佢掟煲兼要掟煲費，孤寒紅星可能知係自己傷咗對方，結果答應咗畀百幾萬個女星。
張惠妹噚日喺台灣出席新碟記者會，佢話緋聞男友王力宏幫佢隻新專輯製作新歌《火》嗰陣，竟然主動要求佢錄一段呻吟聲，阿妹話：「當天錄音時，力宏突然要求我錄一段嗯嗯啊啊，比較呻吟的聲音。」
問到呢段錄音係咪王力宏自己留念？阿妹話佢聽到呢個要求時都非常吃驚，但原來王力宏重親自示範，阿妹笑話：「他就當場表演一段『噢，Comeonbaby，啊』這一類的。」
黎明同鍾鎮濤（阿B）前晚喺將軍澳電視廣播城錄影《勁歌金曲》，黎明話已經好耐冇上過《勁歌》，早前佢曾經話過歌手咪嘴情有可原，對此佢話：「《勁歌》改革幾好呀，唱現場對我冇難度，不斷進步係好事。」阿B亦透露好耐冇參與《勁歌》，但就話：「如果新歌手全部唱live，樂壇就有救，有番啲生氣。」
吳浩康（Deep）噚日到港台接受《娛樂滿天星》訪問，佢噚日一早就約埋Boy'Z去沙灘游水，佢重自爆好鬼細膽，因為除咗怕黑同畏高之外，最驚係鯊魚，所以佢哋游水嗰陣，阿Deep第一件事就係問有冇出咗防鯊網範圍，不過佢強調自己係一個百分百嘅男人，只不過係細膽少少。
王菲將於下月二十七號喺台灣舉行「菲比尋常」演唱會，已經四年冇喺台灣開個唱嘅阿菲，今次話要回饋台迷，特別要求製作單位整「座位區」，因為台灣啲演唱會一向都係得企位，歌迷要好早去排隊爭企前排，阿菲話唔想歌迷咁辛苦，重想設一千個位畀低收入家庭免費入場，認真有心。
歐陽震華（Bobby）噚日返無綫拍攝節目巡禮，對於早排佢喺上海俾人影到同後生女飲嘢件事，佢話一早知道有人影佢，但認為成件事根本冇乜特別，佢去上海係想搞飲食生意。講到謝君豪亦俾人影到「背妻偷歡」，Bobby話當晚謝君豪坐喺佢隔籬，但同對方唔熟。
彭敬慈噚日喺界限街出席電影《雙子》嘅開鏡儀式，對於早前梅媽話過冇一個阿梅嘅徒弟去齋宴，身為阿梅徒弟嘅佢就解釋自己早前去咗內地工作，所以冇人通知佢。彭敬慈重反問記者係唔係其他徒弟都冇去，不過佢亦承認好少同何韻詩、許志安聯絡，所以有任何關於師傅嘅活動都唔知。
