國內人愈來愈有錢，連帶對汽車的需求亦有增無減，兼且品味要求亦不斷提高。有見及此，日本10大汽車品牌之一的光岡（Mitsuoka）早前便透過本港及國內唯一的代理商，引入多款與眾不同的車款到內地。當中，頂級版的Galue仿古型豪華轎車更備受買家所認同。適值有兩部Galue4.5V8左軚版以過境性質到港，我亦把握時機順道試車，親身感受一下呢部Galue豪氣所在。
記者：陳偉林
攝影：伍慶泉 ImageGirl：蔡曉儀
引擎：4494ccV8DOHC
馬力：340ps/5400rpm
扭力：46.0kgm/4000rpm
傳動：5前速半自動波，後輪驅動
懸掛：（前）麥花臣支柱（後）多連桿
制動：（前）透氣碟（後）透氣碟（ABS）
輪胎：235/45R18BridgestoneTuranzaER33
尺碼：5140×1770×1463mm
軸距：2799mm
車重：1808kg
車輛提供：恆昌汽車（23660910）
全車賣點所在，相信會係Two-tone顏色的仿古車體設計，事關香港右軚版都未曾有咁豪，格外烘托得部車嘅貴族氣派，尤其係對大燈配襯埋特大直立式電鍍鬼面罩，還有頭輪一體式拋沙板連頂置霧燈設計，以及頭尾金屬防撞泵把組合，令呢部光岡Galue4.5V8擁有別樹一幟嘅豪華感覺。
除咗賣相夠出位，車廂亦別有洞天。兩排以高級真皮配襯之餘，前排座椅重附有冷、暖透氣配搭，好切合呢排轉涼嘅天氣！再者，除左右獨立恒溫冷氣連Four-zone送風配搭外，原車重備有高級CD音響連後排雙屏幕DVD系統，加上座艙格外出色的隔音結構，置身其中確實寧靜舒泰！
呢部被視為同系至頂級的Galue，引擎配備較原有香港版更大，容積增至4.5公升V8，還附有一套5前速半自動波箱，操控自如又夠敏捷，起跑加速感亦異常突出，最難得莫過於一套穩紮的底盤組合，加上多套主動式VDC、TCS電子系統、四輪碟煞、ABS連EBD輔助下，明顯有更佳的操控性同制動力。
■一雙前排頭枕後方各置有電視屏幕，大可以遙控選擇播放DVD。
