馮仁昭四圍超：洪朝豐美國大彈華仔、克勤

早幾日馮仁昭收到一位讀者投訴，佢話洪朝豐𠵱家幫美國洛杉磯嘅AM1430中文電台做《玲玲林林半個鐘》節目，雖然呢個節目係逢星期一至星期五播出，但洪朝豐係喺香港錄音，然後將錄音帶send去美國。

純粹個人批評
讀者話早幾日洪朝豐喺節目度批評劉德華唱歌難聽，又話李克勤唱歌唔夠氣，佢同華仔嘅震音亦都唔好聽等等，認為洪朝豐咁講對兩位歌手好唔公平。
但馮仁昭打電話問番洪朝豐呢單嘢時，佢澄清話：「我冇講過李克勤同劉德華壞話，我只係話劉德華捲舌音唔標準，同埋唔鍾意佢同李克勤嘅震音！多謝聽眾提出意見，但可能佢接受訊息時有偏差，其實我所講純粹係個人意見同喜好，聽眾有權表達意見，同樣主持都有咁嘅權利。」

Isabella車場撞鬼冇有怕
梁洛施（Isabella）噚日去到將軍澳出席宣傳活動，一大班歌迷早就企定定等偶像出現，點知Isabella一見到記者，就大講佢日前喺停車場懷疑撞鬼，講到似層層咁，真係嚇人一跳，但Isabella就話：「我都有帶護身符㗎，重係媽咪求畀我嘅，我又冇做錯事，唔驚嘅。」

王菲為唱K唔瞓覺
王菲前日去咗台灣拍護膚品廣告，一早開工，拍到夜晚十一點，收工之後重同班工作人員去錢櫃唱K，佢除咗唱莫文蔚同范曉萱嘅歌，重唱咗S.H.E嘅《SuperStar》，工作人員聽到阿菲唱S.H.E嘅歌都幾意外。馮仁昭計一計，阿菲唱到凌晨四點幾先走，都成十九個鐘冇休息，真係體力過人。

方力申嬲Cookies搶化妝師
方力申（Alex）同Cookies等噚日喺銅鑼灣出席時裝店開幕典禮，Alex乘機投訴Cookies搶佢身邊嘅人，佢話：「我同個老闆識咗兩年之後佢就幫Cookies做形象，𠵱家我個髮型師同化妝師都同佢哋一齊用，搞到我原本用三個字化妝都要等成個鐘頭，我都有試過為呢樣嘢黑面！」

張家輝心急造人
張家輝、古巨基同林家棟噚日到尖東出席「助學長征誓師大會」。助學長征大使之一嘅張家輝月中會同太太關詠荷參加三日長征行程，對於近日有傳聞話關詠荷有咗，家輝話：「暫時未有住，事實上我都相當心急，好想有自己嘅小朋友，但係呢啲嘢都係要順其自然。」

Steven屁股傷Kenny額
Boy'Z噚日喺荃灣做「全港家庭親子普通話才藝大賽」總決賽做表演嘉賓，Boy'Z前晚做「香港同胞慶祝五十五周年國慶晚會」時表演咗一個空翻動作，點知Kenny個額頭撞到Steven個屁股，估唔到個額頭即刻撞到瘀咗，Steven話細個時已經俾阿媽話坐唔定，個屁股一定係尖。