咪話我求大俠鼓吹迷信，波衫呢家嘢有時都真係唔好亂着。好似華倫西亞繼上周中歐冠盃輸畀雲達不來梅後，前晚聯賽對貝迪斯再着件黃紅直間藍袖波衫。件衫搶眼就搶眼啦，但好似唔多「老利」，結果華倫又失分。我求大俠建議佢哋都係少着為妙囉。
唔到你唔信邪，重記得上季拉科魯尼亞着件橙白藍三間衫，當季初喺歐冠盃以三比八大敗於摩納哥後，好明顯刻意將呢件衫「打入冷宮」，記憶中無乜再點着，亦少有再大敗。
講番華倫西亞呢件作客波衫，個人主觀印象唔多舒服，又同華倫樸實同講效率嘅踢法格格不入；希望經過連續兩場戰績麻麻比賽後，佢哋唔會點再用呢件不祥之物啦。
曼聯領隊費格遜本來唔畀陣中國腳喺禮拜二前向所屬國家隊報到，即係傑斯唔可以參加威爾斯禮拜二操練，而預料幾位英格蘭國腳亦難幸免；不過爵爺日前突然改變初衷，又肯提前放人。佢「皇恩大赦」，唔知係咪同傳媒嘈得勁有關呢？如果佢真係屈服於輿論，都算係新聞囉。
意甲勁旅祖雲達斯日前練波時多位特別嘉賓探班 新鮮出爐嘅意大利小姐冠軍姬波托！小妮子樣子甜美，又識揀近期意甲戰績最好嗰隊做宣傳，肯定係世界女。當佢被問及最喜歡邊個祖軍球員時，毫不猶豫答迪比亞路。得到美人垂青，希望近期陷於低潮嘅迪比亞路會爭氣啦。
雖然維拉中場軒祖稱不上星級，但自從佢上個禮拜同老婆碧琪分居後，都有「連載」新聞；最新係女方公開數臭佢，話佢係野人一名，成日發老脾，而最離譜係衰爛滾同不忠，背住佢至少搞過五十個女人喎。碧琪重感慨話錢同名氣令軒祖徹底改變。睇嚟球員老婆真係唔易做喎。
前晚法甲聯出現戲劇性爆冷戰果，賽前獲一致睇好兼有主場之利嘅摩納哥，踢到六十分鐘都重由沙維奧拿及艾迪巴約嘅入球領先緊三比○；點知尼斯竟可喺餘下時間入吓一球，入吓又一球，卒之反勝四比三！唔怪得本報名家華度嗰日都話法甲聯亂局，摩納哥主場都唔敢捧啦！