馬會搞國慶盃，重放埋小朋友入場。咁熱鬧八方當然要去趁吓，果然見到好多熟人。
第二場跑山東讓賽，馬主席上，見到立法會秘書長馮載祥。早前馮太喺雅典遇上車禍，八方都寫過，昨日雖然只見馮生不見馮太，相信佢亦冇乜大礙。至於馮生同朋友一齊養嗰隻「哈哈霸」，就讓一讓唐英年「富士晨曦」，僅跑第二。馬主之一嘅黃醫生並冇唔開心，笑住對八方講：「我哋等埋馮太至一齊拉頭馬！」
離開馬主席，馬上碰到馬會董事許仕仁。許老爺有冇馬贏都咁好笑容。問佢代表邊個界別上京觀禮？佢竟然話自己都唔知。問佢有乜搞作，佢就話：咪日日嚟呢度睇跑馬！
最意外嘅係喺會所見到蕭炯柱，呢位前規劃地政局局長，原來已經全情投入退休生活，連佢太太亦離開咗政府。咁點打發時間呢？蕭公子話：做吓義工囉。
傳真︰2623-9278
電郵︰