經濟好番，人人談論加人工，有得加嗰啲，自然諗吓改善居住環境。
美聯郭玉滿話，某玩具廠三個員工，就係因為咁，各自進行換樓大計，重齊齊換入將軍澳區。
玩具廠喺油塘，老闆見生意好，大幅加薪一成半，三個主任級或以上管理層，由觀塘及藍田，換入將軍澳區，其中一個用四百三十四萬，每呎三千二，買入蔚藍灣畔二座高層G上下兩個全新單位，各六百七十七呎，一個自住一個投資。
另一人買入七座高層H逾千呎二手單位，成交價四百一十二萬，每呎三千八。
第三人用四百三十萬，購入清水灣半島二座高層D，一千三百六十呎，每呎三千二。
近排有唔少投資者入市，就連法國巴黎百富勤執行董事顏偉洪，噚日都第二度入市，購買深井碧堤半島二期，繼首輪內購時買咗一伙後，現再以四百八十萬，買咗個二座高層A室，一千二百幾呎。
佢一早就已經係碧堤半島一期嘅業主，確實係呢個盤嘅忠實擁躉，唔知係咪個盤好風水呢？
著名建築師何顯毅，都用四百八十萬，買入二座高層A室，一千零五十呎，打算作投資，呎價四千五百七。
另外，音樂人倫永亮或有關人士，噚日亦以六百六十二萬，購入西灣河嘉亨灣二座高層A，九百一十呎作投資。
港人對樓市信心又爆晒棚，夠膽揸多過一件貨嘅都唔少。
利嘉閣馬忠強話，鰂魚涌一業主，以二百七十八萬，買入太古城鳳山閣中層C，六百七十五呎，買嚟自住。住緊嗰件同區單幢樓，五百幾呎，留番收租博升值。
舊居已經供滿，新嗰件只係做五成按揭，舊租夠供新樓有餘，認真穩陣。
馬忠強話，太古城上月有一百一十六單買賣，比八月增加一倍七，係過去半年新高。
樓價喺回氣之後又再上衝，呢一浪特點，係幾個人夾份買樓投資嘅情況多咗。
香港置業李家銓話，大角嘴凱帆軒二座高層F，六百零八呎，剛由三個畢業幾年嘅大學同學，聯手用二百七十萬承接，每呎四千四百四。
李家銓話，單位先由其中一人睇樓，覺得滿意，就call另外兩個舊同學晚上再睇，跟住扑槌。
佢哋買入單位，計劃長線收租，叫價月租萬一，計落回報有四厘九。
不過，若果喺上會前有客畀到二百九十五萬，就肯割愛咁話。
樓市火熱，竟然重有人肯大平賣，真難以置信。藍田居屋康華苑，A座低層十室，五百七十五呎，只係以七十八萬喺自由市場成交，每呎一千三百六。呢個價連屯門樓都買唔到。
世紀21謝寶昭話，交易足足平咗兩成。佢解釋，因為樓齡舊，有十七年，重係低層，方向又麻麻，不過，最主要係業主已經買咗第二個單位，要趕住賣呢度，咪惟有監平賣囉。
買家乃投資者，計劃翻新件貨放售圖利。據講，佢做裝修，喺屯門同將軍澳有唔少投資。
蘭西
電郵地址：
