立法會議員號稱TheHonourable，人稱尊貴的議員，呢日偶遇鄭大班，於是叫佢一聲「尊貴的議員」，大班話：「有幾尊貴呀？」同佢講唔得三幾句，佢嘅call機猛響，大班立即覆call，只聽到佢問：「W先生，我係鄭經翰，請問你係邊位？有乜嘢指教？」唉吔，講嚟講去，原來對方有病求援，要大班為佢出頭。左丁山笑大班：「議員尊貴在為民請命，做市民冤情大使，你做咗議員，一定俾市民call餐死！或者做餐死！」大班為之苦笑，竟然無言以對，少見也。
市民有病，應該去搵楊永強嘅繼任人或者到醫院排隊，搵尊貴議員未免太過間接，唔通公立醫院專收議員轉介嘅病人咩，如果係咁嘅話，香港社會真係有病咯！
與大班拜拜之後，碰到賓架Q，佢剛自美國做完路演返嚟，好彩碰上長假期，可以透一透氣，但又恐怕香港休市期間，紐約仍然會有電話搵佢，令佢冇覺好瞓。賓架Q話：「做議員為人民服務，唔知道有幾尊貴。我哋帶上市公司去美國做路演，公司嘅CEO要我哋出埋錢，請佢坐頭等飛機，住五星豪華酒店，真係尊貴得很，幫佢推介公司股票，股價升咗有佢着數，但佢認為係明益我哋收多啲經紀佣（做完路演，基金經理好可能入番啲股票）！」
其實好多公司CEO視路演為與投資銀行嘅合作，唔會要求銀行出埋錢，之不過呢間公司嘅CEO特別啲，有風駛盡𢃇，識得「莫待無花空折枝」，所以要求一級尊貴待遇，賓架雖然內心咕咕聲，亦不得不暗呼「忍忍忍忍！」
鄭大班如果做商界大班，雖無尊貴之名，實質享受、待遇，可能更尊貴，譬如上京朝聖賀國慶嘅人士之中，有張志剛（唔係無綫嗰位，而係亞視主持評論節目嗰位）而冇鄭經翰議員，就知道董特首尊重邊一位啦。