劉嘉玲和張震昨日出席「2046Gallery」揭幕禮時，分別乘坐瑪莎拉蒂到場，引起一陣混亂。有報道指劉嘉玲和梁朝偉在台灣宣傳時分房而睡，劉嘉玲對此表示電影公司多預備房間給演員，並不出奇。
劉嘉玲和張震昨日在新太陽廣場出席「2046Gallery」開幕典禮，場內展出兩套《2046》戲服，包括劉嘉玲在片內的未來服飾以及章子怡的旗袍，同時亦展出梁朝偉片中的「2047」房間擺設和演員造型照。
劉嘉玲和張震分別乘坐銀色及黃色開篷瑪莎拉蒂房車到場，吸引過百傳媒和巿民將車輛團團圍着，有自由行旅客更爭相迫進人堆中欲與劉嘉玲握手，場面混亂。
劉嘉玲談到在片中的未來造型戲服，她說：「呢套衫係五年前喺泰國做，成件衫漿到硬晒，所以着呢套衫淨係可以企，唔可以坐，亦因為件衫太硬，所以着嘅時候好易擦損自己。」
有指劉嘉玲和偉仔在台灣宣傳時各有各蒲和分房睡，劉嘉玲回應說：「太私人嘅嘢我唔識答，可能宣傳要製造呢啲嘢畀人寫，澤東係大公司嚟嘅，有多幾間房方便工作人員做嘢都唔奇。」
劉嘉玲又透露在片中印象最深刻的，是與男友梁朝偉的對手戲，令她回憶起張國榮，她說：「嗰場戲佢同我講番《阿飛正傳》未完嘅古仔，同我講番張國榮嘅角色，我覺得突然間好有感覺，令我諗起哥哥（張國榮），之前我同偉仔嘅感情戲我做唔到，但係呢場對手戲就自然好多。」
此外，《2046》已獲安排成為本周四（七日）至周六（九日）在韓國舉行的釜山國際電影節的開幕電影，有份演出的梁朝偉和木村拓哉將赴韓國宣傳，而同屬日本組合SMAP的稻垣吾郎、《花與愛麗斯》導演岩井俊二、本地影星洪金寶和張艾嘉亦會現身釜山電影節。
採訪：卓美娟
攝影：仇志德
