上周國慶假期，香港人山人海，絕大部份係黃金周的大陸旅客，睇嚟零售股隨時發難，再斬多二両。
由於零售股當炒，所以由大廚主理，即將改名做東方明珠實業的大華國際（600），除咗大搞醫療保健業務之外，並計劃進軍皮具零售生意，食住自由行呢條水，果然係一貫香港人趕潮流的作風。
大華上周二起停牌，聽講除組合資公司，搞皮具零售生意外，重包括將原本的皮革製造生意一半權益，賣番畀以前的大股東。經紀陳話，搞埋呢啲手尾，大華嘅殼都差唔多洗得乾乾淨淨。
自從8月份大廚一位地產好友加入做主要股東後，大華股價一度熱炒，最高見0.234元，近排就較為靜，但停牌前收市價仍企硬於0.212元。
經紀陳話，早前市場曾有傳聞，大華或者會再引入策略性股東，所以股價曾經波動，但唔知點解冇咗下文。不過，大華街外貨源稀疏，如果有消息配合，而幕後炒家又手痕嘅話，隨時有異動。
慕容小初