由前國家總理李鵬個女李小琳揸弗嘅「中電國際」今日開始招股，噚日特登搞咗個越洋視像記者會，八方都有去聽。呢啲記者會都會派啲紀念品，通常都同公司業務有關，你估賣電嘅中電國際派乜？居然係一片三條九純金金牌，上面重有隻牛㖭！
八方睇真啲，原來隻牛唔係一隻簡單嘅牛，係以最早喺十一世紀出現嘅中國麗江地區納西族象形文字──東巴文寫成，亦可以話係以東巴文畫成嘅「牛」，或者東巴文嘅「牛」字。知情人士同八方講，揀牛係寄望上市後股價可以「牛氣沖天」，升到好似火箭咁話，揀東巴文呢，就係夠特別喎！
目前專家只係確認出千幾個東巴文嘅字，有幾特別，八方唔係好識，但係八方對中電國際點解揀牛字就有啲好奇。因為睇番中電國際嘅招股書，發現李小姐今年芳齡四十三，按此推算，好大機會屬牛，唔知呢一個因素對揀「牛」字做紀念品有冇關係呢？
（圖）中電國際噚日開咗個越洋視像記者會，重派咗塊「金牛」畀記者。
傳真︰2623-9278
電郵︰