阿胡北京近距離睇完馬，特區上層議論紛紛，講嘅梗係下屆邊個會榮獲阿胡欽點做特首。本來一度大熱嘅唐唐，喺北京蒙阿胡握手時，阿胡嘅眼神五官投射，未見有特別親熱。反為親密戰友田少就慘遭掟咗上山頭高處不勝寒嘅後排，企大專代表隔籬想伸手飛象過河都冇計，田少當堂黑口黑面，證明八方日前所收到消息，胡溫對於去年七七反骨大行動，冇咁容易原諒。
加埋胡溫新政，重點關懷低下層農民，以前肥江天性崇美媚資，肥江清咗場，對於資本家，阿胡內心唔係咁睇佢哋台戲。紀念殘酷鬥爭資本家嘅老毛一百一十歲死忌，阿胡七情上面，而紀念鼓勵大陸走資嘅矮仔鄧一百周年死忌呢，阿胡就只係重點宣傳矮鄧「廢除終身制」，對於矮鄧所講「讓少數人先富起來」嘅光輝指示就按下不表。故此有內部消息講：阿胡欽點下屆特首，個花名凡係有個「少」字嘅，將會通通冇份咁講。反為長毛個花名有個「毛」字，據講阿胡反為有啲好感，所以訓示阿董要多團結有不同意見嘅人，所謂不同意見，係包括咗對於棺材嘅用途有不同意見嘅人士，只要愛國愛港（長毛年年堅持平反六四，效忠中國人民及港人，自然係愛國愛港），大家都有偈傾。
好衰唔衰，噚日唐唐入馬場拉頭馬，戴副黑超，學足商務部長安民副嘜頭。安民曾經大罵榮任抗日將領嘅李柱銘先翁「反華反共」，又屬肥江馬房，唐唐學名人扮相，呢個時候學豬學狗都唔好學安民吖，點解咁失策呢又。加埋拉嘅嗰隻頭馬叫做「富士晨曦」，親日太過出面。祖國錦繡河山，大把名山，點解唐唐隻馬唔叫「泰山晨曦」、「峨嵋晨曦」，又唔叫「長城晨曦」、「黃河晨曦」，要叫做「富士晨曦」呢？側聞阿胡好憎日本仔，珠海三日寇喺正九一八嗰日叫雞，阿胡震怒拍枱，親自向日本外務省交涉，要求通緝三名㗎仔雞蟲。捉嫖客搵東莞公安咪得囉，使乜勞動到總書記咁高層，皆因北京另一股政治勢力話，要有「對日新思維」，主張親日，唔好咁堅持日本仔道歉賠罪咁講。
唐唐如果有少少政治觸覺，喺阿胡清咗肥江場，宣布自己係特區權力揸弗人之後，就好嗱嗱聲將隻馬改名為「黃山晨曦」，因為黃山喺安徽省，近住阿胡鄉下，兼而拉馬頭唔好戴黑超，戴黑超即是拒絕黃山啲太陽光，咁就有力過去祭祖好多倍。所以知情人士話，唐唐今次拉頭馬，雖然贏咗馬會獎金，但喺阿胡心中就未必贏取到獎品嘞。
傳真︰2623-9278
電郵︰