由《JSA安全地帶》導演朴贊郁執導、韓國影帝崔岷植主演嘅《原罪犯》，喺韓國上映以嚟，橫掃當地嘅大鐘同青龍電影大獎，而喺康城除獲荷李活大導演昆頓塔倫天奴（QuentinTaratino）點名推崇，重攞埋康城評審團大獎，啱啱又喺亞太影展捧走最佳導演同最佳男主角獎，呢套引起世界注目嘅韓片，下個星期喺本地上映，入面有唔少好驚嚇嘅場面，觀眾真係要做好心理準備。
飾演吳大秀嘅崔岷植，喺戲中離奇被綁架，而且被人囚禁喺一個地下獄室成十五年。佢為咗記錄被禁錮嘅日子，自己用顏料同針喺手掌上紋身，睇見都打冷震。
喺逃出禁錮後，崔岷植決心追查俾人禁錮嘅原因，其間都有唔少打得好暴力嘅場面，好似佢用鎚仔扑人，同埋用鉗剝人門牙。
崔岷植喺片入面重有更多瘋狂行為，佢喺一間日式料理店就試過生吞大魷魚，成條魷魚入口時，重可以見到啲魷魚鬚郁郁吓。臨尾崔岷植去見劉智泰，佢重剪斷自己條脷，真係唔係人人夠膽睇。至於喺《春逝》扮斯文靚仔嘅劉智泰，今次喺片中扮奸角，重有全裸露股演出，必定令女fans尖叫。