泰山集團（1192）上周四成交量搶升到7430萬股，最近5個月少見。隻股開始有火，加埋喺航運類股份當中，佢最細粒，有得炒。
呢隻集石油運輸、貿易、倉儲碼頭及船舶加油於一身相關企業，04年中期，就因為石油運輸業務溢利搶升，中期純利倍升去到1.55億元。今年1月至7月，中國進口原油同比已經增長40%去到5.3億桶。又1月到8月，中國石油進口對外依存度由去年同期35%，進一步增加到40%。中國進口原油需求仍然咁大，泰山石油運輸業，繼續有運行。粗略計數，04年純利有板有眼，可以近3億元，PE急降到8倍水位。
但泰山資產值，暫時重未夠秤，最新6月底，NAV亦不過0.25元。參考同樣經營石油運輸兼好成熟嘅基金股中海發展（1138），股價相對NAV不過3倍，就算泰山跟足中海走，上到0.75元左右，就要考慮鬆人，又若果隻股超額完成，0.75元之後升幅，咪當Bonus囉。
大慶石化（362）前排以0.3元2供1，散戶落場參與，少之又少，因供股發行4.83億股，包銷商就要硬啃3.34億股。上月中，集團發通告，話包銷商已經成功將呢批貨，承配畀4位非關連人士。
呢隻股，牌頭係大慶，但除咗亨泰（197）屬最大股東之外，大慶市各界人士，未見點浦頭。所以，有關方面，話想憑藉大慶市各界關係脈絡，有所拓展，說服力真係麻麻。但要咁睇，若果肯接呢批供股貨源承配人，唔係擺批貨喺度等煲薑醋，危中有機，應該有轉短線。講到明，呢隻股，呢個禮拜之內，掂唔掂，都要鬆人。
錢雋