上月廿六日生日嘅寇鴻萍，因為當日身在上海，所以佢老友鄭裕玲、江欣燕夫婦、周汶錡、施念慈同梁思浩等，前晚喺壽星女老公梁廷鏘間L16餐廳開P，同佢補祝生日。
當寇鴻萍同大班賓客合照同切蛋糕時，因為人多要排位，壽星女托住個蛋糕等影相，迫吓迫吓，突然成個蛋糕跌咗落地，佢即刻好鬼尷尬，其他賓客亦嘩然。
寇鴻萍定一定神之後就拍手大叫：「唔緊要，好嘢好嘢！」有人又大叫：「落地開花，富貴榮華。」寇鴻萍又話大把蛋糕，攞過個新嘅嚟影相，點知餐廳職員都係執番地下嗰個，砌好再影過。
寇鴻萍今年嘅生日願望係身體健康生意好，佢一臉幸福咁話老公送咗對四卡幾嘅鑽石耳環畀佢，可以襯番佢隻五卡鑽石戒指㖭！鄭裕玲就話佢年年都會送袋畀寇鴻萍，佢哋識咗二十幾年，年年都一齊慶祝生日，好鬼老友㗎！
張學友早前接受台灣電視台名主持張清芳訪問，學友大爆老婆羅美薇有潔癖、鍾意𠵱𠵱哦哦同埋黑面，但係對住朋友就唔會，佢又話老婆平時帶個女出街，都會自備餐具，甚至請朋友食飯，三日前就會諗定準備乜嘢餸。
學友話老婆係處女座，所以凡事追求完美，缺點就係杞人憂天，不過佢最後補飛讚老婆煮餸好好食。
楊崢噚日喺將軍澳行時裝騷，完騷後即有多名師奶、阿叔上前要求簽名合照，嚇咗楊崢一跳，佢話可能因為喺亞視節目教生活小常識有關，佢話：「呢排都真係吸納咗批三、四十歲嘅觀眾支持，可能大家見我講家事，多咗親切感啦！」佢又話前日同九十歲、由馬來西亞來港嘅爺爺食蟹共度國慶敍天倫！
第四十二屆紐約影展前晚揭幕，呢個影展冇競賽，每年選出佢哋認為全世界最出色嘅二十幾部電影參展，今年二十五部影片中，華語片有三部入選，分別係侯孝賢執導嘅《珈琲時光》、張藝謀嘅《十面埋伏》同賈樟柯嘅《世界》，王家衛嘅《2046》反而冇份。
講開《2046》，木村拓哉日前接受《Vogue》雜誌訪問時，話拍呢套戲主要以眼神作為溝通工具，佢又大讚王菲靚，重好有內在美，又好容易相處、沉靜優雅，亦散發女性嘅溫暖。
平時木村會同阿菲講吓笑，而拍呢套戲時，阿菲重幫咗佢好多！
鄭融噚日喺銅鑼灣接受新城電台直播訪問，不施脂粉嘅佢被問到係咪想一改野性形象，反樸歸真？佢話：「今次係為新歌改形象，我都希望可以做到好似梅艷芳咁形象百變。」雖然冇化妝，但鄭融仍不忘露出佢條小蠻腰，相信班男fans都唔會失望嘅！
