無綫人氣劇集《金枝慾孽》昨晚大結局，飾演玉瑩小主而翻身的黎姿，自言角色的狡詐只為適應社會，她也視人生如一場遊戲，當中有贏亦有輸。
黎姿近日憑無綫劇《金枝慾孽》飾演「玉瑩小主」人氣勁升，正當大家都在看她風光的一面時，卻令她回想起初出道時的一件不快事，她笑說：「我初入行時其實係做臨記，一個口靚妹乜都唔識，細路女又冇地位，我好記得拍電影，每組戲都有個茶水阿姐專門負責，喺一個個保溫杯蓋面上寫低演員個名，當時我唔識死走去問阿姐攞杯水飲，結果俾人白眼都唔止，重要一句質埋嚟同我講：『要飲水就自己去買，啲茶係畀主角飲㗎！』」
黎姿續說：「就由阿姐呢句說話開始，我就同自己講，有朝一日，我一定要有自己一個保溫杯，要寫住我個名，呢一樣嘢我已經做到喇，呢個經歷可以反映娛樂圈幾咁世態炎涼。」
有說黎姿演繹「玉瑩」這角色是演回自己，她表示：「我並唔係一個有心計嘅女人，不過我識得保護自己，所有人嘅角色都係反映現今嘅人性，講得好貼切，做人根本唔可能得一個面口生存，並唔係我假，而係做人可以有好多種方式。啲人話我爭戲，我係唔想同人爭，但我個人又比較任性，人哋話我唔得，我就偏要做到畀你睇，我唔會打冇把握嘅仗！」
劇中一幕玉瑩被張可頤飾演的好友安茜出賣，黎姿演來亦入木三分，原來她亦曾試過遭好友出賣，她淡然說：「以前細個好天真，每件事都睇得太簡單，同人講心事，轉頭就出賣你，唔好講係邊個。𠵱家喺娛樂圈打滾咁多年，自然學得世故，總之唔好傷人同自己，我明白到一樣嘢，就係君子之交淡如水。」
黎姿續說：「咪當係一場遊戲去玩囉，我演緊入面其中一個角色，贏到會好開心，輸咗又唔好睇得太重，朋友之間不外乎講吓是非，自己要記住唔好跌落個陷阱度。」
