英國壞孩子RobbieWilliams，當年乃係流行組合TakeThat嘅成員，不過喺九五年嗰陣，Robbie因為同隊中最受歡迎嘅GaryBarlow嗌交而黯然離隊。不過Robbie最近接受電台訪問，大爆有意重組TakeThat，不過Robbie話呢次重組只限於演唱會之上。
Robbie喺TakeThat時鬱鬱不得志，突然宣布離開，之後佢喺樂壇平步青雲，成為撈得最掂嗰個，其他四個成員全部唔見晒影。同隊友各散東西九年咁耐嘅Robbie，最近居然想重組，佢日前接受電台訪問時重話：「我好遺憾當年冇正式同樂迷講byebye，我重好想知道啲樂迷，記唔記得我哋當年所跳嘅舞。」
不過Robbie當時係間接俾人迫走，今日Robbie有咁嘅成就，其實都係想威番畀Gary睇，Robbie話：「Gary同我講過最有用嘅說話，就係喺我決定離開組合時嗌我走。」其實Robbie𠵱家開到口，相信佢嘅舊隊友都好樂意一齊開演唱會賺一筆。
此外，黑人小天后Beyonce個爸爸兼經理人，日前要求Robbie同佢個女合作，佢重話Beyonce其實好冧風趣幽默嘅Robbie，而此舉又可以幫佢喺美國打出名堂。