出身自電影世家的黎姿，祖父是「電影之父」黎民偉，從她十四歲入行開始，人人皆稱她為「電影之父」孫女，但此簡單一句的稱呼，令黎姿多年來的心結沒法解除，她甚至覺得自己有辱家聲。
黎姿說：「拍戲咁多年，從來冇人提我嘅演技，是非、緋聞做封面就有好多，曾經俾人話成績都未有就搞咁多嘢，我家庭講pro（專業），雖然我父母一句說話都冇講過，但我自己好大壓力，覺得好內疚，外邊嘅朋友、親戚係咁叫我做爺爺個孫，我聽到都覺得好醜。以前拍咗咁多商業電影，一路都俾人話靠個樣、靠身材，人人當我係花瓶，我一直都等一個好時機，希望遇到個有發揮機會嘅角色，今次拍《金枝慾孽》演玉瑩，外界反應唔錯，或者可以算係對家族有個交代，但係我個心重有個大情結，始終想喺電影方面有一番作為。」
黎姿從小就翻閱祖父母留下來的照片，父母又會不時提及他們以前的事情及作品，像阮玲玉的事，曾幾何時，黎姿的父母擔心女兒會步阮玲玉後塵，走上自殺不歸路。
黎姿說：「阮玲玉係為『人言可畏』四個字而死，我入行後有過唔少是非，覺得人好恐怖，加上我本身又情緒化，啲人問我拍《金枝慾孽》點解可以咁快喊得出，就係因為我個人情緒起伏大，父母就驚我學阮玲玉咁走去自殺，由我爺爺到我呢一代係第三代，只有我做娛樂圈，唔衰得，所以壓力好大，亦曾經一剎那有呢個諗法，最終都係父母嘅愛幫我度過難關。」
黎姿情史豐富，至今她對愛情依然有份執着，她說：「我係愛情忠僕，最大心願係結婚生仔，𠵱家雖然有人追，但始終都唔係我心目中杯茶。」
說到感情事，黎姿曾有難忘回憶，其中一段情，她自覺曾為對方作出犧牲，她說：「以前拍拖為個男仔，可以喺佢公司樓下等幾個鐘，個手提電話時時刻刻都要放喺接收得到嘅地方。試過有其他女仔打畀佢，或者佢望其他女仔，我就即刻發癲。」今天的黎姿，看來已難再如此投入了。
撰文：魯萍
攝影：林德雄、仇志德
