上星期某日《蘋果》李八方有一段寫尊貴議員余若薇，話到余若薇年輕時本想做記者，入大學讀新聞系，但余若薇以為香港啲大學冇新聞系，阿媽錫住佢，唔想佢離鄉別井，於是入咗香港大學讀法律。後來做咗大律師，而且有名有利㖭，做立法會議員只是錦上添花而已。
新聞老鬼N睇到呢段八卦料，有啲條氣唔順。「余若薇幾多歲呀？好似五十歲啩，當佢十七歲中學畢業，加五年，即係二十二歲讀完港大！應該係一九七六年。」老鬼N話：「可能余大小姐當時眼角高啫，當中文大學唔係大學。中文大學在一九六七年已有新聞系畢業生啦。作家圓圓兩公婆、倫兆銘，加埋《真欄日報》太子爺梅寬，就係第一屆畢業生；一九六八年第二屆有港台黃德貽、《壹週刊》創刊總編輯梁天偉；我嘅老友吳明林就係六九年畢業嘅。余議員如果係一九七三年揀大學新聞系，當年中大新聞系畢業生就有當今機管局傳訊主管鄭麗敏。所以當年嘅余小姐如果唔係無知，就係睇唔起中大。香港以前發律師，余小姐選讀法律系，當然絕對正確，唔係嘅話，邊有今日咁巴閉吖，我哋做傳媒，就窮到兩袖清風。但要還事實一個公道，中文大學於一九六三年成立之時，就已經有新聞系㗎嘞！」
余小姐唔知喺邊間名校畢業呢？當年啲英文中學名校校長，好反對學生報考中文大學入學試嘅，特登喺中大入學試舉行期間，舉行中六中七mockexam（港大入學試練習）或者學期考試。就算學生堅持，啲校長都會游說佢哋放棄中大，改投港大。新聞老鬼N入行多年，現已退出呢行，當然知道呢類事情，新入行記者，可能真係信中大以前冇新聞系㖭。